Nongpoh, Nailar 19: Hadien ka jingud jingnam jong ki paidbah nongshong shnong bad ki bor pyniaid shnong ka Shnong Mawiong, ka Kong Rona Khymdeit kum ka MDC ka Nongpoh mynta ka sngi ka la leit ban jurip ia kawei na ka jingtei ka sorkar kaba la shu iehnoh la bun tylli ki snem khlem pyntreikam bad kane ka dei ka Common Facility Centre na ka bynta ka kam thaiñ jaiñ bad thir ksai kaba don ha ka Shnong Mawiong ba hap ha ka Pahambir Cluster ha Nongpoh Constituency.
Kane ka Common Facility Centre ka dei kaba la tei naduh u snem2012-2013 ha ka jinglut kaba la kot T. 20 lak ba la bei tyngka lyngba ka Skhim BRGF jong u snem 2012-2013 ha ka Shnong Mawiong, kaba dei ka shnong tang katto katne Kilomiter na ka sor Nongpoh.
Halor ka Nongrim ka jingbym lah ban pyntreikam naduh kitei ki snem 2012-2023 ba la kot la 12 snem ei ei mynta ba la tei ia katei ka Common Facility Centre kaba la mang na ka bynta ka kam thir ksai (Spinning) bad ka kam thaiñ Jaiñ (Weaving), ka Kong Rona Khymdeit kum ka MDC ka la leit ban jurip shi bynta ban tip halor ka jinglong jingman katei ka jingtei sorkar kaba ym pat lah ban pyntreikam haduh kine ki sngi.
Ha kane ka jingleit jurip la don ryngkat u Rangbah Shnong ka Mawiong u Bah Mathius Maring, u Secretary Shnong u Bah Crosmel Maring, u Bah A. Maring Secretary ka Raid Nonglyngdoh, ki riew rangbah katei ka shnong.
Ha kane ka jingleit jurip, ka Kong Rona Khymdeit ka la kular ban shim khia ban kren sha ka tnad ba dei peit ia kane ka kam bad ruh ban kynduh ia u Myntrei ba dei peit ia kane ka kam, da ka jingthmu ban pyntreikam noh ia katei ka Common Facility Centre khnang ba ka jingdon katei ka jingtei ba la pynlut pisa ki lak tyngka da ka sorkar kan ai jingmyntoi ia ki nongthir ksai bad ki nongthaiñ jaiñ katei ka shnong bad katei ka thaiñ.
