Nongpoh, Nailar 19: Ka kyrwoh kaba la phah da ki nongialam ka Ri Bhoi Youth Welfare Organisation (RBYWO), ia kaba la soi da u Bah Ban Kharnaior, President bad u Bah Keny Nongrum, General Secretary, la ong ba ki la dep ban phah Dorkhas sha u Conrad K. Sangma, Myntri Rangbah ka sorkar jylla, na bynta ban pynpaw ia ka jingpyrshah kaba jur, halor ka jingthmu thied jaka ka Meghalaya Industrial Development & Finance Corporation (MID&FC) ne ka Meghalaya Industrial Development Corporation (MIDC) ha Umtham Village, Ri Bhoi District.
Ha ka kyrwoh, ki la pynpaw, ba kitei ki nongialam ka RBYWO, ki la ioh jingtip ba ka sorkar lyngba ka MID&FC/MIDC, ka la don jingthmu ban thied ia ka jaka kaba don ia ka jingheh kumba 14 Akar bad katei ka jaka, kaba dei ka jaka jong u Rick Kharkongor, ha kaba ki la thmu ban thied ia katei ka jaka ha ka dor kaba la poi sha ka T. 21 Klur.
Shuh shuh, ka kyrwoh kaba la ong ruh, ba lada khein ia ka jingheh katei ka jaka bad ia ka pisa kaba yn pynlut ban thied ia katei ka jaka ha Umtham, kaba mut ba ka jaka, ka la poi ha ka dor kaba T. 450 shi square feet, hynrei ha ka jinglap ka seng ka long ba ka dor ka mur jong ki jaka ha katei ka thain, ka dei hapoh ka T. 150 shi square feet.
“Ngi sngewlyngoh, ba kumno ka tnat MIDC ka kwah ban thied rem ia katei ka jaka ha Umtham, wat haba ki la dep tip shai ba ka dor jong ka jaka ha katei ka thain, la lah ban ioh ha ka dor kaba duna, ha kaba halor kane ka bynta, ka seng ka suba ba lah pynban ban don kaei re kaei sha lyndet, ne ka jingthmu bamsap na katei ka kam thied jaka ka tnat MIDC ha Umtham bad ka seng ka sngew ruh ba katei ka kam thied rem dor ia ka jaka ba dang ioh ha ka dor kaba duna, ka dei tang ka kam ban pynsyrwa kai ia ka pisa u paidbah” la pynpaw ha ka kyrwoh.
Sangeh shwa shipor ia katei ka jingthmu thied jaka ka MID&FC/MIDC ha Umtham bad lada kwah ban tip ia ka dor ba shisha jong ki jaka ha katei ka thain, pynlong shwa ia ka jingwad bniah ban lap ia ka dor ba shisha jong ki jaka ha ka thain Umtham, nalorkata leh da kaba tyngeh ia ki ophisar kiba don bynta ha katei ka kam ba thied rem ia ka jaka ba dang lah ban ioh ha ka dor kaba duna, namar ki dei kiba thmu ban bamsap bad pynsyrwa kai ia ka pisa u paidbah, pynkut ka kyrwoh na kitei ki nongialam ka RBYWO.
