Shillong, Nailar 21: Ha kawei na ka jingjia kaba ym poi pyrkhat satia mynta ka step ha Jan Thadlaskein Mukhla ba hap ha West Jaintia Hills, kawei ka Kali rit ka la shah ban ha ka Trok haduh ba la julor phum bad donbok 2 tylli ki Kali ki la lait salit na kane ka jingjia.
Kumba la ioh lum jingtip, kane ka jingjia ka la jia mynta ka stetp ha ka por 11 .30 baje mynstep ha jan ka Pung Thadlaskein ha West Jaintia Hills.
La iathuh ruh ba kane ka Trok ka dei kaba don ia u number UP 76 T 1960 bad kaba kit ia u Clinker ha kaba ka dang wan na ka thaiñ East Jaintia Hills, hynrei khlem poi pyrkhat hadien ba la poi ha katei ka jaka ka la kylla kynsan ba ka la ioh ban ban ia kawei ka Kali Maruti Eco kaba don ia u number ML 04 E 0731.
Halor kane ka jingjia, la iathuh ruh ba 2 ngut kata shi kmie shi khun kiba dang iaid lynti ki la shah syllad ha kane ka trok, ha kaba na ka daw ka jingmynsaw la pynkit noh mar mar sha ka jaka ai jingsumar.
La ong ruh ba u Dribar ka Maruti Eco u dang sahkut hapoh katei ka Kali ba la shah ban ha katei ka Trok. La iathuh ruh ba nalor katei ka Maruti Eco, la don ruh ka kali kamai Tourist kaba don ia u number ML 04C 5529 kala shah ban na ka bynta ba shakhmat bad kawei pa ka kali private kaba don ia u number ML 04D 3446 kala dei malu mala.
