Nongpoh, Nailur 07: Kumba 10 ngut ki bar jylla ba la suba ba ki lah ban dei ki Khar Bangladesh kba wan na Barpeta Assam, ki la shah pynpynphai kylla noh ha ki nongialam ka HNYF 20mer Circle, kaba dei hadien ba ki nongialam ki la ioh bat na kawei ka Bolero kaba don ia u number AS 17 H 2676 ha ka jingsuba ba ki lah ban wan rung tuh sha kane ka jylla.
Ki nongialam ka HNYF 20mer Circle ki la bat ruh ia katei ka Bolero ka dei hadien ba ki la suba ba kitei ki bar jylla ki lah ban dei ki Khar Bangladesh kiba wan na Bepeta Assam bad ha ka jingtohkit la lap ba kitei ki bar jylla kim don satia ia ki kot ki sla ban pynshisha ia lade ba ki dei ki nongshong shnong ka India.
Ka seng HNYF ka la pynlong ruh ia ka jingpeitngor na ka jingwan rung kyrthep ki bar jylla, ka dei hadien ba ka sorkar Assam ka la khynra naphang ia kito kiba wan sah beain ha Assam bad kum ka seng ruh ka la bat ia kitei ki bar jylla halor ka nongrim ba ki lah ban dei ki Khar Bangladesh kiba la shah beh na Assam.
Na ka liang u Bah George Tangsang kum u Adviser ka HNYF 20mer Circle, haba kren halor kane ka bynta u pynpaw ia ka jingsngewkhia ba ki bar jylla ki ioh rung suk beit sha kane ka jylla khlem ki kot ki sla bad u la buh ruh ka jingkylli kumno kitei ki Khar Bangladesh ki ioh ban rung tuh haba la don ka Infiltration Check Gate ha Byrnihat.
Shuh shuh, u la bynrap ruh da kaba ong, ka seng la pyntip ruh ba la ioh ban kem ia kine ki 10 ngut ki suba Khar Bangladesh kiba ym don kot don sla sha ka Infiltration Check Gate Byrnihat ban wan shaw biang ia ki na ka bynta ban dang tohkit bniah bad kaba sngewlyngngoh ka long ba ki ai jubab ba kim don satia ia ki Kali ki motor ba wan shaw ia ki.
