Nongpoh, Nailur 07: Ym lah ban tip ha kano ka rukom ha kaba wat u rangbah Shnong uba dei ban ia khun pyrshah ia ki jingdih basniew ne ki kam sniew, hynrei ki Pulit ka Ri Bhoi ki la kurup pynban da u Ganja ha kaba ym lah ban tip la u thmu ban die beain ne pyndonkam ia lade.
Kane ka la paw hadien ba la ioh lum jingtip, ba ki Pulit ka Ri Bhoi ki la ioh ban kem ia une u rangbah shnong bad kurup ruh ia u Ganja ha ka jingpynapshrip ha Umpowin ha ka 5 tarik u Nailur 2025 ha ka por 9 baje mynmiet.
Kane ka jingioh kurup ia une u Ganja, ka dei hadien ba ki Pulit ki la bat ia kawei ka Kali kaba don ia u number ML-04-A-8969 bad kaba la ñiah da u Batskhem Sohtun bad uba dei ruh u Rangbah Shnong ka Shnong Umshangktat, kaba dei ka shnong ha khappud ka Meghalaya bad Assam ha ka thaiñ Block II ha Ri Bhoi District.
Kumba la ioh lum jingtip, ki Pulit ki la pynapshrip ia katei ka Kali u Rangbah Shnong ha Umpowin, ka dei hadien ba ki la ioh jingtip ba katei ka Kali ka kit ia u Ganja bad ha ka jingtalasi ki Pulit la lap kumba 124.14 gram u Ganja, kaba dei jong utei u rangbah shnong bad ym lah pat ban tip la u pyndonkam ban dih ia lade ne u die beaiñ ia ute u Ganja.
Shuh shuh, la iathuh ruh ba ki Pulit hadien ba la ioh kurup ia utei u Ganja ki la kem noh ia utei u Rangbah shnong u Bah Batskhem Sohtun bad ki la pynlong ruh ka jingtohkit ba la suba ba ioh u don kti ha kaba shalan beaiñ ia u Ganja ha katei ka thaiñ Khappud.
