Ka jingther u lapbah ba jur haka janmiet jong ka sngi Saitjaiñ ka la wanrah ïa ka jingshlei um kaba jur ha surok bah kaba don marjan bad ka Umling Facilitation Center. Kane ka jingjia ka la pynkylla ïa ka surok kum ka pung bad la pynlong ruh ïa ki kali ban sahkut bun kynta, kaba la ktah jur ïa ka leit ka wan jong ki paidbah.
Ka jingbym biang ha ka rukom shna nala bad ka jingsahkut ka um ka la long ka dawbah bala wanrah ïaka jingshlei um ha katei ka jaka ha kaba ka um kaba la lang ha baroh ar liang jong u surok 4 lane kala pynlong ïaki kali rit ban sahkut shipor ha katei ka jaka tad haduh ba ka um ka hiar bad duna.
Ban pynlait na ka jingdheng kali kaba jur, ki pulit pyniaid kali na Nongpoh ki la leit mar mar sha katei ka jaka ban pyniaid bad pynlait na ka jingdheng kali. Ha kajuh ka por, ka kompani shna surok NHAI ruh ka la shimkhia bad la phah noh ïa ka kali puh shilum ban tynruh bad ban pynkhuid ïa ka nala kiba la sahkut jaboh kaba la long ka daw jong kane ka jingshlei um.
