Nongpoh, Nailur 26: Tang hadien 2 sngi ka jingshah rah bor uwei heprit ba dang 9 snem na ka shnong Bir, kaba la wan rah ka jingtieng jingsyier ia kiba bun ki mar khap shnong, hynnin ka janmiet ha ka por 6 baje ei ei na ka liang jong ki katto katne ki rangbah jong ka shnong Rtiang Mawrong road ki la lap ba don ki briew ki bym ithuh bad kiba ym dei ki briew shnong ba shang bad swait ha kawei ka jaka khlaw ba kham duna ïing bad kiba i shan khmat ba lehse ki dei ki riew riew sniew.
Na ka liang kine ki briew shnong kiba la iohi ia kine ki briew bad kiba la pyrshang ban kren ia ki bad kylli ia ka jaka sah, hynrei uwei u la kynthih noh sha kawei ka khlaw bad lap sa tang ki dien jat ba thiah ki phlang.
Wat la ka liang ki briew shnong ki la pyrshang ban pyrta brieiw bad beh ia ki, hynrei namar ba la sdang dum bad sheptieng ba ioh dang don shuh kiba rieh kim shla shuh ban tur shakhmat bad ki la shu ap haduh ban da wan bun ki briew shnong.
Na ka liang kine ki briew shnong kiba la lap ia kitei ki briew ki la pyrshang ban wad ia kitei ki suba riew sniew bad kim lap dien satia ia kitei ki briew na ka daw ka jingrben ka khlaw. Kum ba pyntip, kane ka Shnong Bir bad ka Shnong Rtiang ka jngai kumba 2 km
Halor kane ka jingjia, na ka liang ki Pulit ka Umsning tang mar ia ioh jingtip halro ka jingdon kitei ki briew ki la hiar mardor ban pynlong ia ka jingtohkit bad ban lap ksai ia kitei ki briew bad ha kajuh ka por ki la buh ruh da ka jingkyrpad ia ki briew shnong baroh kawei ba ki dei ban pyntip mardor lada don kino kino ki briew ba bym ithuh lane ki briew ba phylla. Kine ki long ruh katkum ka jingiakren bad pyntip da u Rangbah Shnong ka Rtiang u Bah Raplang Marshiang.
Ryngkat ki bor shnong bad ki VDP bad ruh ba ki Pulit ki la rai ruh ban pynlong da ka Search Operation sha ki bynta jong kitei ki khlaw khnang ban lap ia kitei ki suba riew sniew.
