Nongpoh, 26 Nailur: U Myntri ka sorkar jylla uba dei peit ia ka tnat C&RD Block, u Bah Sosthenes Sohtun, uba dei ruh u MLA Jirang, mynta ka sngi u la leit ban plie paidbah ia ka Water Harvesting Structure cum Eco Tourism Park hapoh ka shnong Umlyngkdait Tasku, Ri Bhoi.
Ia katei ka Water Harvesting Structure cum Eco Tourism Park, la tei lyngba da ka RIDF jong ka NABARD ha ka jinglut kaba la kot sha ka T. 1 klur, ha kaba la tei khnang ia katei ka projek ka long ban pynlong kum ka jaka pynlang um, ba ki nongrep kin ïoh pyndonkam ha ka por ba ki rep ki riang bad donkam um, nalorkata kan long ruh kum ka jaka leit shangkai pyngad, da ka jingdon ki Lieng kynda bad ki jaka shongkai pyngad.
Haba plie ia katei ka projek, nalor ka jingdon u Bah Sosthenes Sohtun, la sakhi ruh da ka jingdon u Zenedic D. Shira, Director ka Soil & Water Conservation, u C. Awasthi SDO Civil Sub-Division Patharkhmah, u K. Synrem Divisional Officer Soild and Water Conservation Division Nongpoh, u Bah E. Syngkli, Rangbah Shnong Umlyngkdait Tasku, ki ophisar na ka Soil, PHE, PWD lem bad ki paidbah jong katei ka thain.
Haba nga kren kum u MLA ka thain, nga kmen eh haba nga ïohi ba ki kam pynroi ki poi sha ki shnong ki thaw kiba hap ha Jirang Constituency, ha kaba kumba ka long mynta, ki shnong kiba hap Jirang Constituency, ki la kiew eh mynta ban haba ia nujor bad ki por ba la leit, ong u Bah Sosthenes Sohtun.
Halor ka jingioh kam pynioh ki shong ki thaw ha Jirang Constituency, u Bah Sosthenes Sohtun, u la iaroh ia ki ophisar sorkar ha ki tnat treikam bapher bapher, namar lyngba ka jingtrei shitom ka jong ki, ka pynlong ia ka Jirang Constituency, ba kan nangkiew katba nangmih ki sngi ki por.
