Shillong, Jylliew 16:
Da ki spah tylli ki kali ki la sahkut biang hadien ka jingtwa khyndew ha ka surok bah National Highway 6 ha ka thain Ratacherra jong ka East Jaintia Hills District hynne ka step jong ka 16 tarik u Jylliew, 2024. Na ka liang jong ki bor pyniaid district jong ka East Jaintia Hills, ki bor pulit lem bad ki bor ba dei khmih jong ka National Highway Authority of India (NHAI) la ioh ba ki la pyndonkam da ki puh shilum ban weng bad pynkhuid ia ka khyndew kaba la twa ha katei ka surok bah.
Kum ban shu kdew hangne, ka surok bah National Highway 6 ha kine ki thain jong ka East Jaintia Hills District kadei kaba la jot rathai bad sniew haduh katta kata mynta la bun snem, kaba la pynsyrtok bad buh jingeh shikatdei ia ki paidbah nongleit nongwan kiba pyndonkam ia kane ka surok bah.
Katei ka jingsniew palat pud jong ka surok bad ka jingbym shimkhia jong ka sorkar jylla ban maramot ia katei ka surok kala pynlong ruh ia ki paidbah ka thain ban thaw syndon ia ka Joint Action Committee (JAC) kaba la shim ia ka rai ban pakhang ia kane ka surok naduh ka 19 tarik jong u bnai Jylliew 2024. Kane ka jingpakhang surok kadei kaba khlem buh pud bad yn weng tad haduh ba ki bor ba dei khmih jong ka sorkar jylla, ka National Highway Authority of India (NHAI) lem bad ka National Highways and Infrastructure Development Corporation Limited (NHIDCL) kin maramot bad shna pyndep ryngkat ki nala um kiba paka.
