Nongpoh, Jylliew 16:
U myntri rangbah jong ka jylla Assam, u Himanta Biswa Sarma, hynne ka sngi u la leit ban jurip ia ka jingiaid shait shait ka jingpyntrei ia ka shlem treikam kaba thymmai bad kaba heh duh jong ka tnad pulit ka sorbah Guwahati ia kaba la tip kum ka Commissioner of Police ha Khanapara.
Katei ka shlem treikam jong ki pulit ka sorbah Guwahati la tei ha ka jinglut kaba la kot sha ka T. 110 klur ha ka jaka kaba heh kumba 1.25 akar bad ka la pynwandur ban thaw ia katei ka shlem treikam kaban iasyriem kum ka shlem treikam jong ka National Investigation Agency (NIA).
Ka tyllong khubor ka iathuh ruh, ba kane ka shlem treikam ba thymmai jong ki pulit ka sorbah Guwahati la khmih lynti ba kan sdang ban treikam noh naduh u bnai Nailar mynta u snem 2024 ha kaba ki tnad treikam jong ki pulit ka sorbah Guwahati ba kynthup naduh ki kam pyniaid kali, ki kam ban iada bad tohkit ia ki kam sniew, ki kam ophis bad kiwei kiwei de kin long lyngba kane ka shlem treikam kaba thymmai.
Ha ka jingleit jurip jong u Himanta Biswa Sarma mynta ka sngi ia kane ka shlem treikam kaba yn pynbit pynbiang katkum ka juk kaba mynta, la sakhi ruh da ka jingiadon ryngkat jong u Commissioner of Police ka sor Guwahati, u Diganta Barah, ki heh ophisar jong ka tnad pulit, ka tnad Public Works Department bad kiwei kiwei.
