Nongpoh, Risaw 13: Kum ka jingsngew burom bad ka jingsngew sarong halor ka jingïoh bhah u Bah Sosthenes Sohtun, kum u Myntri ka Sorkar ka Jylla ba lamkhmat da ka MDA, na ka liang ka Synjuk ki Rangbah Shnong ka Byrnihat Area, mynta ka sngi ka la pynlong da ka programme pynkup burom ïa une u nongmihkhmat u ba dei ruh u MLA bad MDC ka Jirang Constituency.

Ha kane ka programme la lamkhmat da u Bah Johniyo Syiem, Secretary ka Synjuk ki Rangbah Shnong Byrnihat Area, u Bah Kendrowell Lapang Chairman ka Synjuk ki Rangbah Shnong ka Byrnihat Area nalor ki Rangbah Shnong jong ki Shnong bapher bapher ka thaiñ Byrnihat.

Haba kren ha kane ka programme, u Bah Sosthenes Sohtun, u la pynpaw ïa ka jingkmen kaba khraw halor ka jingshimkhia jong ka Synjuk ki Rangbah Shnong ka Byrnihat Area kiba la ithuh ïa ka jingtreishitom jong u MLA ka Jirang Constituency khamtam ïa u Myntri Rangbah ka Jylla u Conrad K Sangma u ba la ailad ïa u ban rung lem ha ka thup jong ki Myntri ka sorkar jylla.

Nalor ka jingai khublei, u Bah Sohtun u la kyntu jur ïa baroh ki Rangbah Shnong khamtam kane ka thaiñ ka dei ruh ha khappud bad ka Assam, ban peitngor ïa ki jingsniew bapher bapher kiba mih na ki jingdih buaid kum u drok, ka jingwanrung kynthlep ki mynder ri bad wat ki jingsniew kiba la nang kynrei na ka jingshah rahbor ki khyllung khynnah kiba la ïai jia hapoh ka jylla Meghalaya.