Nongpoh, Risaw 13: U Bah Mayralborn Syiem, MLA jongka Nongpoh konstitwensi mynta ka sngi u la hiar sha Diwon ban plie paidbah ïaka Auditorium jongka Nongltuh Higher Secondary School, kaba dei kawei na ki skul kaba rim bha ha ka thain Umden Nongtluh bad kaba seng kyrpang na ka bynta ai ïaka jingnang jingstad sha ki khun samla ka thain, kiba wan naka longing kaba duna ha ka ioh ka kot.

Nalor u Bah Mayralborn Syiem, ha kane ka sngi plie ïa katei ka Auditorium jongka skul, la sakhi ruh ïaka jingdon ryngkat jong u Bah Hesting Syiem, Principal, u Bah W Shylla, Chairman ka Managing Committee, u Pa’iem Vincent E Syiem, Syiem ka Raid Nongltuh nalor kiwei kiwei de ki riew rangbah, ki nonghikai, ki khynnah skul bad paidbah nongshong shnong ka thain.

U Bah Mayralborn Syiem haba ai jingkren ha kane ka sngi kum u kongsan, u la pynpaw ïaka jingïaroh sha ki bor pynïaid bad nonghikai jongka skul naduh kiba la shong thait bad kiba la khlad noh ruh, halor ka jingiohi jngai ka jongki ban ai ïa ka jingnang jingstad sha ki khun samla ka thain, kiba long ka lawei jongka jaidbynriew.

Utei u nongmihkhmat u la ong ruh ba katei ka skul, ka long kum ka sharak ding kaba ai jingshai ïa kiba bun ki khun samla jongka thain, kyrpang eh ïa kito kiba wan na ki longing kiba duna ha ka ioh ka kot bad ki bym lah ban phah sha ki skul kiba don kum sha Nongpoh ne sha sor Shillong.

U Bah Mayralborn Syiem u la kyntu ruh ïa ki bor pynïaid skul lem bad ki nonghikai ba ki dang ïai bteng ban ai ïaka jingshakri kaba paka sha ki khun samla ka thain bad ba kin long kum kata ka sharak ding kaba shai ban btin lynti ïa ka lawei ka jongki khun samla.

Ha kane ka sngi, na ka liang u Bah Mayralborn Syiem u la pynbna ruh ïaka song pisa kaba T 2. Lak na ka bynta ban pynheh shuh shuh ïa ki kamra klass, kum shi bynta na ka thong bad ka jingthrang ka jong u  ban kyntiew ïaka pule puthi ha katei ka thain bad ka konstitwensi hi baroh kawei.