Nongpoh, Naiwieng 10: Kum ka jingailad ia ki khynnah skul ba kin sei madan ia ki sap ki phong kiba ki don shaphang kata ka jingstad saian ne ki buit treikam katkum ka jingstad saian, ka Lord’s Academy Secondary School, Umsawriang mynta ka sngi ka la pynlong da ka Science Exhibition halor ka phang, ‘ Innovation is the key to the future’.

Ia kane ka Science Exhibition la wan ban plie paidbah da u MLA ka Umroi u Bah Damanbait Lamare kum u kongsan bad la sakhi lang ruh da ka jingdon lang u Principal ka Lord’s Academy u Fr. Francis C, ki nonghikai, ki khynnah skul, ki kmie ki kpa bad ki Principal jong ki skul kiba iajan bad katei ka skul pule.

La sakhi ruh lyngba kane ka Science exhibition, ki khynnah skul ki la pyni ia ki sap ki phong ba ki don ban shna ia ki jaid jingshna bapher bapher kiba long katkum ka jingstad saian bad ia kitei ki jingshna bapher bapher ruh ki khynnah skul ki lah ban batai ha kano ka rukom ki shna bad ki pynwan dur kaba long hi kum kata ka jingstad saian.

Haba kren ha kane ka sngi kum u kongsan, u MLA ka Umroi u Bah Damanbait lamare u la pynshlur ia ki khynnah skul ban dang trei shitom haki sap ba ki don, ban long ruh kita ki khynnah kiba don ka akor ka burom bad ban burom ia la ki nonghikai bad ki kmie ki kpa khnang ba kin lah ban poi sha ka thong jong ka jingim.

Shuh shh, u la iaroh ruh ia ki bor pyniaid jong ka skul kiba la pynlong kum kane ka prokram ban ai rynsan ia ki khynnah skul ban sei ia la ki sap ki phong bad u kyrmen skhem ruh lyngba ka jingdon kum kine ki rynsan kan pynshlur ia ki khynnah skul ba kin dang ioh mynsiem ban dang wad kham bniah shaphang ka jingstad saian kaba long ka jingmyntoi na ka bynta ka lawei jong ki, u la bynrap.