Nongpoh, Naiwieng 12: Kumba 200 ngut ki samla na Ri Bhoi mynta ka sngi ki la ioh pdiang ia ki synod hadien ba ki la pyndep ia ka prokram ai jinghikai kaba 3 bnai ba la pynlong da ka Northeast institute of Professional Studies (NeIPS) ha Ri Bhoi, ha ka kaba ia kine ki syrnod la sam ha ka jingialang kaba la long mynta ka sngi ha dorbar hall Sajer Nongpoh.

Nalor kitei ki synod lane ki Certificate ba la sam sha ki samla ba la pyndep ha kane ka prokram ai jinghikai  kaba long 3 bnai kynthih, la sam ruh ia ka Appointment Letter na ka bynta kito ki samla kiba la ioh kam (Job Placement) kiba hap ban leit trei shabar bad kynthup ruh kito ki samla kiba seng kam seng jam lajong.

Ia kane ka prorkam la wan ban shim bynta da u Deputy Commissioner ka Ri Bhoi kum u kongsan  bad ka Kong Rona Khymdeit kum ka symbut kongsan bad la sakhi lang ruh ha kane ka sngi da ka jingdonlang ki ophisar na DCIC, MSSDS bad kynthup ruh kitei ki samla kiba la pyndep ia ka jingai jinghikai lyngba ka Northeast institute of Professional Studies rygnkat ka jingkyrshan ka Skills Meghalaya lyngba ka sorkar jylla.

Ki jaid kam kiba ki la ai jinghikai ha kane ka prokram ai jinghikai ba 3 bnai ki kynthup ia ka Commis chef, lead sofa, gents wears, assistant beauty bad F&B Service.

Haba kren ruh ha kane ka sngi, na ka liang u Deputy Commissioner ka Ri Bhoi u Abhilash Baranwal bad ka MDC ka Nongpoh ka Kong Rona Khymdeit ki la ai jingiaroh ia ka Northeast institute of Professional studies kiba la shim ia kane ka bynta ban ai jinghikai ia ki samla kiba ym donkam don jam bad ki kyrmen skhem ba da ka jingdon kum kine ki jinghikai kan plie lad ia ki samla ba kin seng kam seng jam la jong.

Shuh shuh, ki la ban khia ruh lyngba ka jingdon kum kine ki lad ai jinghikai ha ki jaid kam bapher bapher kane kan iarap ia ki samla ban pyntbit ia lade, namar hakum kane ka pyrthei kyrduh kam kyrduh jam tang kito kiba tbit ha ki jaid kam bapher bapher ki lah ban ioh kam ioh jam lane ki lah ban seng kam seng jam da lade ban kyrshan ia lade bad ia ka ïing ka sem.