Nongpoh, Naiwieng 13: Ki 30 tylli ki Eri Silk Spinning Centre, kiba don bad ki Mashin ne ka jaka ba ki Nongthir Ksai Ryndia ki ïoh ban thir ia ki Ksai Ryndia, ia kaba la ïoh ha ki CR&D Block kiba don ha Ri Bhoi, la pynbna paidbah ba la plie noh mynta ka sngi ha shnong Umkynsier, Ri Bhoi Sepngi.
Kum ban shu kdew hangne, ba ia kitei ki Eri Silk Spinning Centre, ka dei ka sienjam kaba la shimkhia da ki bor Distrik ka Ri Bhoi ha iingiatreilang ka Meghalaya State Rural Livelihoods Society (MSRLS) bad kaba la kyrshan na ka Indian Oil Corporation Limited (IOCL), ha kaba ka jingthmu ban tei ia kitei ki Eri Silk Spinning Centre, ka long ban kyntiew ia ka kam thir Ksai Ryndia bad khamtam eh ban kyntiew ia ka iohkam iohjam ki Longkmie ha ki shnong Nongkyndong ha Ri Bhoi.
Ia katei ka Eri Silk Spinning Centre ha Umkynsier, la wan ban plie paidbah da u Bah Sosthenes Sohtun, Myntri Sorkar jylla, ha ryngkat ka jingdon u Abhilash Baranwal, Deputy Commissioner ka Ri Bhoi, nangta u Mukesh Ranjan, Executive Director ka IOCL, u Raja Brahma, Project Director, u Dr. Hajong, BDO Jirang Block, ki riew rangbah ka thain, ki longkmie na ka shnong Umkynsier lem bad kiwei.
Haba kren ha katei ka sngi, kata naduh u Abilash Baranwal bad u Mukesh Ranjan, ki la ong ba la ban pynurlong ia kitei ki 30 tylli ki Eri Silk Spinning Centre ha Ri Bhoi, ka dei lyngba ka CSR Project, ha kaba ka jingthmu ka long ban ïarap sha ki shnong nongkyndong bad ba kan long kum kawei na ki lad aikam aijam sha kito ki nongthir ksai ba kiba ju pyndap ia ki jingdonkam ha iing ha sem, na kaba thain ksai Ryndia.
Haba ai jingkren ha katei ka sngi ba la plie ia ki Eri Silk Spinning Centre, na ka liang u Bah Sosthenes Sohtun, u la ai ka jingiaroh kaba khraw eh ia ki bor Distrik, MSRLS, IOCL lem bad ia kiwei kiba la donkti ha ka ban pynioh ia kitei ki Eri Silk Spinning Centre, namar ka la ai jingmyntoi eh na bynta ki nongthir ksai ha kylleng ki jaka ha Ri Bhoi.
U la ong ruh, ba kumba bun ki jaka ba Ri Bhoi ki dei kiba ri ia u khniang Ryndia bad kiba ju pynmih ia u ksai, ha kaba ki ju pyndonkam da ka rukom treikam ki menbarim bad kaba kham shimpor ha ka ban thir ksai, hynrei mynta lyngba ka jingioh ia ki Eri Silk Spinning Centre, kan pynmyntoi eh ia kito ki nongthir ksai, namar ka rukom treikam ruh ka la kham stet, kham pynsuk bad kiba lah ban thir shibun ki ksai tang ha ki por ba khyndiat.