Shillong, Jylliew 17:
U nongai ktien jongka seng Voice of the People Party (VPP), u Bah Batskhem Marboh u la byrthen ban ujor da ka ejahar pyrshah ia u myntri ha tnad pule puthi ka jylla, u Rakkam A Sangma halor ka jingkynnoh donkti ban pynshit bad wanrah ia ka jingiapher jaidbynriew hapdeng ki Khasi bad Garo ha kawei na ki jingialap ilekshon MP ha ki thain Garo Hills.
Katkum katei ka jingringdur kaba la saphriang, kaba na ka liang jong ka shlem u Meghalaya Post kam lah ban pynthikna la kadei kaba shisha ne em, la iohi ba u Rakkam A Sangma, u la kynnoh ba lada ka seng VPP kan jop ia ka ilekshon MP, lada ka VPP kan thaw sorkar ha ka District Council bad kan ioh ruh ia ka bor ban synshar ha ka jylla, ki jaidbynriew Achik kin sa shah leh donbor, kin sa shah beh bad kin sa shah pyniap bad kin sa hap ban iam bad jaw ummat.
U Bah Batskhem Marboh u la iathuh ba u la dep ban iohi katei ka jingringdur halor ka jingkren jong utei u myntri sorkar bad lada kadei kaba shisha, kum u myntri u dei ban hiar shuki noh namar ka jingdonkti ban wanrah ia ka jingsngewpher jaidbynriew bad ber bih ia ka shongsuk shongsain jong ka jylla.
‘Ngi la rai ban ujor da ka ejahar ban ailad ia ki bor jong ka ain, ba kin pynlong ia ka jingtohkit halor katei ka kam, khlem ka jingtieng ne ka jingleh shilliang khmat’ la ong u Bah Batskhem Marboh bad bynrap ba ki briew bunsien kiba ju kynnoh ia ka VPP ba kadei ka seng kaba iashah kynhun jaidbynriew, kidei maki pat kiba iashah jaidbynriew da kaba pynmih ia ki jingkynnoh ki bymdon nongrim pyrshah ia ka VPP.
U la ong ba bunsien ki la don ki jingthmu ban pynthobria ia ka VPP da kumne kumtai, bad buh jingkylli ruh ba hato kita ki seng sain hima sima ki ju lap ju shem ia ki jingkren jong ki nongiam ka VPP, la kadei lyngba ka jingrindur ne jingthoh ba ki byrngem ia ki jaidbynriew ki bym dei ki Khasi? Da kaba bynrap ha ka jingjia shah pyniap jong u bar jylla ha Mawlai Mawroh, kadei tang ka seng VPP kaba la mih shakhmat shwa ka ilekshon ban kyntu na ka bynta ban pynneh ia ka shongsuk shongsain bad dawa ruh na ka sorkar ba kan pyntreikam iala ka bor khlem ka jingleh shilliang khmat.
Utei u nongai ktien ka VPP, u la ong ruh ba ka seng VPP hi ka ieng halor ka nongrim ban iada ia ki hok ba kyrpang jong baroh ki jaidbynriew trai ri trai muluk bad ha kajuh ka por ka burom ruh ia ka hok jong kiwei pat ki bymdei ki trai ri trai muluk.
