Nongpoh, Nailur 24: Ha ka sien kaba nyngkong, ka skulbah University of Science & Technology Meghalaya (USTM), ka la pdiang bad pynlong ia ka 42 Meghalaya Battalion NCC Combined Annual Training Camp 2025 (CATC-103), kaba long ruh kum shibynta ba katei ka skulbah ka la pdiang ban pynlong ia katei prokram, kum ka dak ba katei ka skulbah, ka don ryngkat ha ka ban kyntiew ne pynkup bor ia ki samla bad ruh ban kyntiew ne iada ia ka ri
Haba pynlong ia katei NCC Combine Annual Camp 2015, la sakhi da jingdon u Thongam Joten Singh, Group Commander ka Shillong Group NCC kum u Kongsan, ha ryngkat ka jingdon kiwei ki heh shipai, kiba kynthup ia u Lt. Col. Virender Pant, Lt. Col. Shashank Parmar, u Mahbubul Hoque, Chancellor ka USTM, ki samla kiba don bynta ha ka NCC lem bad kiwei.
Haba kren ha katei ka sngi, kitei ki heh ka NCC lem bad ki heh shiphai, ki la kren sha ki samla ba don ha ka NCC, ba ki dei ban long kiba don ia ka Discipline, ka jinglong ban long nongialam bad khamtam eh na bynta ban iada ia ka ri.
Lyngba katei ka 42 Meghalaya Battalion NCC Combined Training, ha kine ki 10 sngi ban wan, kin don kumba 500 ngut ki khynnah NCC na ki jaka pule bapher bapher, kin sa ioh ia ki jingshah training bapher bapher, kiba kynthup ia ka jingleh Drill, ka rukom pyndonkam ia ki tiar siat, ban pynbiang ia ka met ka phad, ka jinghikai shapang ki samla bad ban iada haba don kino kino ki jingjia shah pynjulor ha ka mariang.
