Nongpoh, Nohprah 10: Hadien bun snem ba ki paidbah ka shnong Diwon kila ap khmih lynti ban ioh noh ïaka Auditorium kaba paka, ka jingphohsniew ki paidbah kala urlong mynta ka sngi hadien ba u MLA ka Nongpoh u Bah Mayral Born Syiem ba dei ruh u Chairman ka Meghalaya State Advisory Board u la leit ban plie paidbah ïa katei ka Auditorium kaba la pynsahnam ruh ha ka kyrteng u Dr DD Lapang (bam kwai ha dwar u Blei) u ba dei ruh u Myntri Rangbah barim ka jylla bad MLA barim ka Nongpoh.

Ha katei kajuh ka sngi naka liang u Bah Mayral Born Syiem u la leit ruh ban plie paidbah ïaka iing ICDS ha katei kajuh ka shnong ha kaba la sakhi ruh da ka jingdonlang u Raja Brahma Project Director ka DRDA, Bah Eric Dkhar BDO ka Umling C&RD Block, Bah R Kharshilot Child Development Project Officer, Bah Balajied Ranee MDC barim ka Nongpoh, Bah Bishar Tmung Rangbah Shnong bad kiwei kiwei ki riew rangbah naka thaiñ Umden bad Diwon.

Haba kren maitphang ha katei ka sngi naka liang u Bah S Khymdeit Secretary Shnong ka shnong Diwon u la ïathuh ba katei ka iing mynshuwa la tip kum ka Diwon United Youth Association (DUYA) Hall kaba la seng naduh u snem 2004 da ki katto katne tylli ki club kiba don ha Diwon bad ka jingiohi jngai jong u Dr DD Lapang halor ka jingdonkam jong ki club ban don ïaka hall bad ka jaka treikam.

Haka jingïaid lynti jong ka por, dei ha u snem 2023 ka Dorbar Shnong kala pan noh ban shimti hi noh ïa katei ka hall bad haka jingsngewthuh jingmut ka shnong kala shimti bad la pynkylla kyrteng noh ïaka sha ka Diwon Auditorium, kaba kum ka shnong bad wat ki shnong ba marjan ki lah ban pyndonkam haki jingïalang bad ki prokram bapher bapher, bad dei haka jingbuddien bad u MLA ka shnong kala lah ruh ban pynitynnad ïa katei ka Auditorium bala mang kyrpang lyngba ka skhim SRWP bad pynsahnam syndon haka kyrteng u Dr DD Lapang (Bam Kwai ha Dwar u Blei).

Haba kren ha kane ka sngi naka liang u Bah Mayral Born Syiem kum u kongsan u la pynpaw ka jingsngewkmen kaba khraw ban plie paidbah ïa 2 tylli ki kam pynroi ha katei ka shnong ba kynthup ïaka iing ICDS bad kumjuh ruh ka Auditorium Hall kaba long ka jingkyrkhu bad ka jingmyntoi kaba khraw ïa katei ka shnong.

U la ong ruh ba katei ka auditorium ka dei matti jong u Dr DD Lapang, bala aiti sha ka kynhun ki samla ha katei ka shnong bad hadien phew tylli ki snem la ioh ban plie paidbah noh ïa kane ka iing kaba la pynsahnam ruh ha kyrteng u Maheh Dr DD Lapang watla katei ka hall ka dei ruh kaba la pyndonka  naka por shaka por naduh ki por ba mynshua hynrei mynta la lah ban pynbha shuh shuh haka rukom kaba janai bad itynnad.

Shuh shuh ha kaba ïadei bad katei ka iing ICDS ka dei ka jingmyntoi ïaki khynnah bad ki longkmie ha katei ka shnong kaba la shna ruh haka rukom kaba janai namar haki por ba mynshuwa katei ka shnong kam don ka iing ICDS ban sam jingbam ïaki khynnah bad ka jaka pynlut por ki khynnah.

Kum u nongmihkhmat u la kyntu ruh ïaki paidbah nongshong shnong ba kin ai ka jingtreilang ban ïatylli naka bynta shibun ki kam pynroi kumba katei ka thaiñ Diwon bad Umden ka dei ruh kaba la tip kum ka shnong u ksai Ryndia ban dang pynjanai shuh shuh ban kyntiew ïaka rukom pynmih ïa u ksai bad jaiñ Ryndia.

Ha kane ka juh ka sngi la ioh ruh ban pynkup burom iaka samla Dahunshisha khymdeit ka ba la khur takma ksiar haka open full contact karate championship 2025 ka ba la long haka 29 and 30 november ha Kolkata