Nongpoh, Nailur 07: Ban dang pyrkhing ia ki Kali ar-shaka kiba ju pynkheiñ aiñ haba iaid ba ieng lyngba ka surokbah National Highway-6 ha Ri Bhoi, ki Pulit ka tnad Traffic na Nongpoh mynta ka sngi ki la dang bteng ban bat ia kiba bun ki Kali ar-shaka kaba long kum ka jingtehlakam ba ki hap ban bud ia ki kyndon thik pa thik kaba dei katkum ka Motor Vehicle Act.
Ia kane ka jingbat ne khynra ia ki Kali ar-shaka la pynlong ha khmat ka ophis u deputy Commissioner ka Ri Bhoi ba hap ha ka surokbah National Highway-6 ha Ri Bhoi bad lyngba kane ka jingbat ne khynra ki Pulit ki la ioh ban daiñ kuna ia bun tylli ki Kali Ar-shaka kiba pynkheiñ kyndon.
Kum ban pynkynmaw, ki Pulit ka tnad Traffic na Nongpoh na ka por sha ka por ki ju pynlong ia ka jingkhynra ne bat ia ki Kali ar-sha ha ka surokbah, kaba dei shi bynta ba ki hap ban bud ia ki kyndon, hynrei katba ki Pulit ki dang pyrkhing dang don ruh kiba ialeh pyrshah khlem bun ia ki kyndon.
Kane ka jingbat ki Pulit ia ki Kali ar-shaka ka dei ruh ba bunsien ki la ju jia ki jingjia ba sngewsih kaba kim ju bud ia kita ki kyndon kaba la ju mana ban deng ia ki Helmet, ban don ki License, ban kiar na kaba dih ba bam bad ka jingpynher sted ia ki Kali.
Haba ioh lum jingtip na ki Pulit, la ong ba bun ki Kali ar-shaka ki la shah bat mynta ka sngi ha kane ka jingkhynra ia ki Kali ar-shaka bad kito kiba pynkheiñ aiñ kim lait satia na kita ki kyndon ba la buh katkum ka aiñ.
Shuh shuh, la iathuh ruh tang mynta ka sngi U Blei ba la pynlong ia kane ka jingbat ia ki kali ar-shaka, ki pulit traffic ka Nongpoh ki la ioh ban daiñ kuna ia kiba bun kita ki nongpynkheiñ aiñ bad lyngba ka e-challan ki Pulit ki la ioh ban lum ia ka khajna kaba la kot sha ka T.34,000.
