Nongpoh, Nailur 8: Ki nongialam ka HNYF Northern Region, ia kaba la ialam da u Bah Afred Malai, General Secretary, ha ryngkat ka jingsynran ki nongialam bad dkhot ka HNYF 20-Mer Circle, mynta ka sngi, ki la leit ban kynduh ia ka Kong B. Rani, ADC Ri Bhoi, na bynta ban pynsngew sha ka halor ka jingpyrshah ban iaid ki kali kitkhia lyngba ka surok na Umrit haduh Umdu.
Ka nongrim kaba la pynlong ia ka seng ba kin leit kynduh ADC bad ujor halor ka jingiaid ki kali kitkhia lyngba katei ka surok, ka dei hadien ba ki la ioh jingtip, ba ki don shibun tylli ki kali kitkhia kiba iaid lyngba katei ka surok, kata naduh Pahammawlein 20mer-Umdu bad shaduh Umrit, ha kaba ka jingiaid ki kali kitkhia, ka la pynjot hi thiaw ia ka surok bad khamtam eh ka jingma na bynta ka jingkieng kaba don ha Lailai.
Haba kren sha ki lad pathaikhubor, u Bah Alfred Malai, u la ong ba hadien katei ka jingleit kynduh ADC, na ka liang ka seng ka la maham ia ki trok heh bad ki ba kit palat pud, ba ki dei ban sangeh noh ban iaid lyngba katei ka surok.
Haba iadei bad ka jingleit kynduh ka seng ia ka ADC Ri Bhoi, na ka liang ka ADC, ka la kular ban shim khia halor kane ka phang bad naka liang ka seng ka la kyrpad ba ki Bor Distrik, ba ki dei ban pynsangeh noh mardor ia kitei ki trok kitkhia kiba iaid lyngba katei ka surok.
