Nongpoh, Nailur 09: Ka ophis ka District Tuberculosis Officer, Ri Bhoi District mynta ka sngi ka la rakhe ïaka 3rd Anniversary jong ka Pradhan Mantri TB Mukt- Bharat Abhiyan ryngkat ka jingsam ïaki marbam sha ki 13 ngut ki nongpang TB bala naka dong Ri-Bhoi kiba dang don hapdeng ka jingshah sumar bala noh synñiang da u Samla Pyndaplang Wahlang uwei naki samla rangbah ka them Ri-Bhoi bad naka kompani NEZONE pipes and structures and NTL Steels kaba na Byrnihat kum ki Ni-kshay Mitra bad ïa katei ka jingïalang la pynlong ha Conference Hall jong ka Nongpoh Civil Hospital.
Ha katei ka sngi la sakhi ruh da ka jingdon ka Dr Ar Marak DMHO ka Ri-Bhoi District kum ka kongsan, ka Dr E Kalwing District Tuberculosis Officer, u samla Pyndaplang Wahlang, ki nongmihkhmat na katei ka kompani, ryngkat bad 13 ngut ki nongpang TB.
Kumba la ioh lum jingtip naka Dr E Kalwing kaba dei ka District TB Officer ka Ri-Bhoi District kala pyntip ba haduh mynta ki don kumba 314 ngut ki nongpang TB bad tang 217 ngut kidei kiba ioh jingïarap bad kiba tam nangta ki dei ki bym pat ioh jingïarap.
U Samla Pyndaplang Wahlang kum uwei naki samla na ka them Ri-Bhoi u ba la mih shakhmat ban ïarap marbam sha ki nongpang TB, haba kren ha katei ka sngi u la ai ka jingïaroh ïaka sorkar kaba la buhthong ban rat diengkhong ïa katei ka jingpang lyngba ka Pradhan Mantri TB Mukt- Bharat Abhiyan.
Shuh shuh, u la ong ruh ba kino kino ki kynhun lane ki riew shimet ki lah ban ïarap ïakitei ki nongpang, ha kaba bun napdeng jong ki ki dei kiba wan naka longiing ba duk ba rangli bad shem jingeh shisha ban ioh ïaka bam ka dih kaba biang bad kaba thikna, namar kum ki nongpang kiba dang don hapdeng ka jingshah sumar ki donkam ïaka bam ka dih kaba biang ban ioh jingkoit kham kloi na katei ka jingpang nalor ka jingdih dawai.
