Shillong Ïaiong 19:  Ka jingïakhih ka Green Tech Foundation ban pyrshah jur ïa ka jinglilam ka sorkar ïa ka Dewlynnong Lumpongdeng da kaba pynlong da ka jingshah thngan ha Madan Malki ka la poi sha ka 12 sngi kynthih bad hadien ba la shah sumar u Chairman u Bah H. Nonglang na ka jingtlot na kaba shah thngan la mih bujli sa u Secretary u Bah Ritre Lyngdoh ha kaba ki dang skhem ban pyrshah ïa ka projek ban ktah ïa ka Dewlynnong Lumpongdeng ha Umiam.

Kumba la sakhi mynta ka sngi ka 20 tarik u Ïaiong, kaba dei ka sngi nyngkong jong ka taiew, u General Secretary ka Foundation u Bah Retre Lyngdoh u la bteng ban shah thngan ha ka jaka u Chairman bad la poi mynta la kumba 76 kynta ka jingshah thngan bad ka koit ka khiah jong u ka dang biang wat lada u la sdang ban ring tlot.

Kumba la pynpaw da u Secretary u Bah Retre Lyngdoh, u la ong ba ki Doctor ki la peit la khmih ïa ka jinglong ka koit ka khiah jong u naduh mynstep wat haduh janmiet bad ka jinglong ka jingman jong u ka dang biang lut bad lait noh ka jingtyrkhong um ka met malu mala.  U la ong ruh ki bor sorkar kiba mihkhmat naduh ki pulit bad ki doctor ki peit pyrman bha ïa ka koit ka khiah jong u bad bun ruh ki paidbah kiba la wan ban kyrshan ïa kane ka jignshah thngan.

Shuh shuh, ki Doctor ki la ong ba ka koit ka khiah jong u ka la nang tlot bad kumba long haduh mynta u dang sngewbiang.  Na ka liang ka Green Tech Foundation ka la dang ïai dawa ban pynduh pyndam noh ïa katei ka projek ha Umiam bad khamtam ka jingai wai ïa ka dewlynnong Lumpongdeng, ba ka Foundation ka pyrshah jur.