Nongpoh, Naiwieng 13: Kum kawei na ka skul ba la suit la shor ha ka Shnong Umpowin na ka bynta ban kyntiew ia ka jingnang jingstad ki khynnah kiba wan na ki shnong nongkyndong bad khamtam na ki shnong khappud, ka Mangkathiang Makdoh Secondary School, Umpowin mynta ka sngi ka la rakhe ia ka sngi kyrpang jong ki khynnah ba altip kum ka Children’s Day.

Haba rakhe ia kane ka sngi kyrpang ki khynnah la wan ban shim bynta da u Working President ka RBYF u Bah Liander Nongshli kum u kongsan bad lsa khia lang ruh da ka jingdon lang  u Bah P.P Kylla Chief Organizing Secretary ka RBYF, u Principal katei kas kul u Bah Paulloste Makdoh, ki nonghikai, ki khynnah skul bad ki kmie ki kpa ryngkat ki nongshong shnong.

Shi bynta na ka jingrakhe ia kane ka sngi kyrpang ki khynnah, ki nonghikai bad ki khynnah skul ki la shim bynta ha ki jingialehkai bapher bapher kum shi bynta ban pynphuh pynphieng ia kane ka sngi kyrpang jong ki khynnah.

Haba kren ha kane ka sngi kum u kongsan u Bah Liander Nongshli u la ban khia halor ka jingkordor jong ka jingnang jingstad ban saindur ia ka imlang ka sahlang. U la pynshlur ruh ia ki khynnah skul ban trei shitom bad ruh ban don kata ka akor ka burom ia ki nonghikai bad ki ba la heh la san khnang ba kin ioh shibun ki jingkyrkhu ban dang kiew ha ka lynti iaid jong ka jingim.