Ka jingbthei ba shyrkhei ha kawei ka kali Hyundai i20 kaba don ïa u number HR 26 CE 7674 ha nongbah Delhi hajan Red Fort kaba la pyniap ruh kumba 13 ngut ki mynsiem briew ka dei ka jingbthei kaba pynkyndit bynriew ïaka ri baroh kawei hadien ba ki runar kila pyndonkam ruh da ki tiar pynbthei kiba khlaiñ bor ha katei ka kali.
Katkum ka khubor bala ioh lum la ong ba katei ka kali ka dei ruh kaba la bujli trai haduh 4 sien naduh u snem 2014 khlem da register ïaka kyrteng hadien bala aiti shawei bad ka dei ruh kali kaba la don bun ki kuna pynkheiñ aiñ.
Naka liang ki pulit ka Nongbah Delhi haka sngi ba ar kila register ïaka ejahar bad pynhap ruh hapoh ka kyndon aiñ Unlawful Activities (Prevention) Act (UAPA) bad Explosive Act ha kaba ïadei bad kane ka jingjia ryngkat ka jingtohkit naki kynhun bapher bapher ba kynthup ïa ka National Investigation Agency (NIA) bad National Security Guard (NSG).
Kum ban shu kdew hangne kawei ka kali Hyundai i20 kala kemding hajan Red Fort Mtero Station Gate No 1 bad bthei syndon ha katei ka jaka kaba la wanrah ka jingiap briew kumba13 ngut bad 24 ngut kila mynsaw jur.
Naka liang u myntri ka tnad kam pohiing ka ri u Amit Shah mynta ka sng u la lum ruh da ka jngïalang ïa ki heh ophisar pulit bad bthah ruh ïaki ban kthong bad kem lut ïa baroh kiba donkti ha kane ka kam bad baroh kiba donkti kin ngat haka jingpynsajia kaba tyngeh.
