Nongpoh, Naiwieng 11: Ka Meghalaya Cricket Association (MCA), lyngba u Bah Rayonald Kharkamni, Honorary Secretary ka MCA, mynta ka sngi ki la kynduh bad phah Dorkhas sha u Conrad K. Sangma, Myntri Rangbah ka sorkar jylla bad kata ka long ban pynpaw sha u Myntri Rangbah ka sorkar jylla halor ka jingeh kaba la kynduh da ki samla ba ialehkai Kriket ha ka jylla, kiba ju iatyngkhuh barabor ba ha ka por ba don ka kam ialehkai Kriket bad ha kata ka por ka ju don ruh ki eksamin bapher bapher hapoh ka jylla Meghalaya.
Ha ka Dorkhas ia kaba la phah da ka MCA sha u Conrad K. Sangma, ki la pynpaw, ba ki don shibun ki samla kiba donsap ha ka kam ialehkai Kriket ha ka jylla bad kiba mihkhmat na ka jylla ha kiba bun ki lympung ialehkai Kriket ha ka thain bad kiba mihkhmat ha ki lympung ha ki rta bapher bapher bad kaba la pyniaid da ka Board of Control for Cricket in India (BCCI).
Shuh shuh, ki la pynpaw ruh ba kitei ki khynnah ba donsap ha ka kam ialehkai Kriket, ki donkam ban ioh ia ka jingshah hikai kaba biang, kata la ka long hapoh ka jylla ne shabar jylla, hynrei ha kaba kum katei ka por, kiba kum katei ka jingdonkam ki samla donsap ban ioh ia ka jingshah hikai, ki mad jingeh pat ha ka ban pyniahap ia ka kam ialehkai bad ka jingdonkam ha ka jingpule ka jong ki.
Kumta lyngba katei ka Dorkhas, ia kaba la phah da ka MCA sha u Conrad K. Sangma, ki la kyrpad sha ka sorkar ba kin pyrkhat kyrpang ha ka kam pule puthi bad ban ailad ba kin iohlad ha ka ban ioh ba kin thoh ia ka Eksam kaba kyrpang, kata ka dei na bynta kito ki khynnah kiba donsap ha ki kam ialehkai bapher bapher bad kiba mihkhmat ia ka jylla ne ia ka ri.
Lyngba ka Dorkhas ia kaba la phah da ka MCA, kam shym la thew kyrpang eh tang ia ki samla kiba ialehkai ha ka Kriket, hynrei ha katei ka Dorkhas, ki la kdew ba katei ka jingkyntu jong ki sha ka Sorkar, ka long ba dei ban don ka jingpyrkhat kaba kyrpang na bynta jong baroh ki samla kiba donsap ha ki kam ialehkai bapher bapher bad kiba ju kynduh jingeh haba ki iakhun ia ki eksamin ha ka jylla bad lada ka sorkar kan pyrkhat ne ban thaw ia ki kyndon ain kiba thymmai, khnang ban kan iarap ne ailad ia kito ki samla donsap ha ki kam ialehkai, ba ki iaid ryngkat ryngkat ka kam ialehkai bad ka jingpule puthi.