Nongpoh, Rymphang 23: Ha ka jingialam u President u Samla Banralang Masharing bad u General Secretary u Samla Iatyllilang Sawkmie, ka RBYF Raid Nongtung Circle mynta ka sngi ka la mih ban pynkhuid ia ki jaboh ba bret ki paidbah ha jrong ka Jingkieng ka wah Umkhen ha Ri Bhoi District.

Kane ka jingmih kine ki nongialam ka RBYF Raid Nongtung Circle, ka dei shi bynta ka jingsngewkhia ba bun ki padibah ki bret ia ki jaboh hajrong ka jingkieng ka wah Umkhen bad kim ju pyrkhat satia ia ka jaboh kaba ktah ia ka wah bad ruh ia ka mariang.

Haba pynpaw da kitei ki nongialam, ki la ong ba ka seng nangne ka maham jur ia baroh ki paidbah ba leit ba wan lyngba katei ka surok ba pyniasoh na Ri Bhoi sha Jaintia ba hap ban iaid lyngba katei ka jingkieng Wah Umkhen ba kim dei ban bret jaboh pathar bad lada lap ka seng kan leh da kaba tyngeh.

Shuh shuh, ki la maham ruh ba ym bit ba bret jaboh sha ka wah umkhren ne pyniap ia ki dohum da kaba wieh dawai ne shoh kharu bad lada ka seng ka lap ia kum kine ruh kan aiti sha ki bor ka ain. Ki leh ia kane ka bynta ruh namar ba ki kwah ban pynneh pynsah ia ka khuid ka suba jong ka wah Umkhen bad ruh katei ka jingkieng kaba bunsien ki paidbah ki bret pathar ia ki jaboh sha ka surok.