Nongpoh, Nailur 26: U C.H. Vijayshankar, uba dei u Lat ka sorkar jylla, mynta ka sngi, u la hiar sha Ri Bhoi bad ban leit jurip ia ka Dispensary kaba don ha ka shnong Umiam ha Ri Bhoi.
Ha katei ka sngi, ba u Lat ka jylla, u la leit ban jurip ia katei ka Dispensary, u la sam da ki soh kaba la thep ha ki shang sha ki longkmie ba armet bad uba la sam ruh ia ki tiar sop poi bnai sha ki kynthei ba dang shu khie samla.
Kum ban shu kdew hangne, ba katei ka jingleit jurip u Lat ka jylla ia katei ka Dispensary ha Umiam, ka long ruh kum shibynta ban iasnohktilang bad ka Swasth Nari Sashakt Parivar Abhiyan, kaba long kum ka jingialap paidbah ne (Campaign), ba ka sorkar India, ka la sdang naduh ka 17 tarik mynta u bnai haduh u bnai, na bynta ban pynlong ia ki prokram ha kylleng ka ri, ha kaba ka jingthmu ka long ban pynkhlain ia ka koit ka khiah na bynta ki riew kynthei, kata naduh kiba dang rit, kiba la samla bad khamtam eh na bynta kito kiba armet.
Ha katei ka sngi, ba u Lat ka jylla u la hiar sha katei ka Dispensary kaba don ha Umiam, la sakhi da ka jingdon u Abhilash Baranwal, Deputy Commissioner ka Ri Bhoi, u A.R. Marak, District Medical & Health Officer; u Raja Brahma, ADC Ri Bhoi, ki nongtrei ASHA lem bad kiwei.
Lyngba katei ka sngi, u Lat ka jylla, u la ioh ruh ban iakren bad phylliew jingmut bad ki nongtrei ka koit ka khiah, kumjuh ruh ka jingiakren bad ki riew paidbah kiba don ha katei ka Dispensary ha Umiam.
