Nongpoh, Nailur 25: Kawei naki shlem ai jinghikai Computer sha ki khun samla jong ka dong bad ka thaiñ Ribhoi, kaba la tip kum ka Ka Regional Institute of Advanced Studies (RIAS), mynta ha ka 25 tarik Nailur ka la pynkup burom ïa ki samla pule kiba la pyndep ïa ki jingshah hikai haki kyrdan bapher bapher jong ka Computer Application ïakaba la pynlong mynta ka sngi ha Science Hall ha Nongpoh.
Ha katei ka jingïalang pynkup burom la wan ban sakhi lang da u Bah Mariahom Kharkhrang u wei naki heh Pulit uba la shongthait uba shim bynta kum u Kongsan, u Pastor KB Kharbteng uba dei ruh u Vice Principal ka Alpha English Hr. Sec. School, Kong D. Nonglait State Secretary ka BJP, u Bah Marcus Marten kum u riew rangbah bad u Bah Skhem B Swett uba dei u Director ka RIAS haka jingïadon ryngkat lang ki samla pule kiba la dep pyntbit haki kam kor Computer lem bad ki kmie ki kpa.
U Bah Kharkhrang kum u kongsan u la ai ka jingïaroh ïa ki samla pule kiba la kloi ban mih shakhmat ban nang lum jingstad shuh shuh ïa lade nalor ki kam pule puthi hapoh ki kamra skul ki la long shlur ruh ban mih shakhmat ban shah hikai pat sa haka kam Computer. U la ai ka jingïaroh ruh ïa ka RIAS halor ka jingpyrshang jong ka ban ai jinghikai kaba bniah ha ki jingstad computer bapher bapher kaba long Kum kawei naki kam shakri sha ki khun samla ban nang plie lad plie lynti iaki kamtam ha kum kane ka juk kyrduh kam kyrduh jam.
U bah Skhem B Swett, Director ka RIAS u la ong, Ka jingpynlong ia kum kine ki program kiba kyrpang naka bynta ki samla kiba la pyndep shah hikai komputer ka long ban nang ai mynsiem iaki khun samla ba kin sngewthuh ba ki jingnang jingtip ba ki la ioh lum na kane ka Shlem ka long kaba Kordor eh haka jingim jong ki.
U la ong ruh ba kane ka juk kaba mynta ka long kum ka Lawei kaba dum, namar ba hadien ba ki khun samla ki la pyndep ïaki jingpule jong ki hynrei ki hap ban shong iing khlem kam khlem jam. Kumta, Ka jingnang jingtip iaka kot computer ka dei kaba donkam eh namar ha kino kino ki kam kiba mynta ngi donkam eh iaka jingnang jingtip iaka kot Computer.
Ha kajuh kapor, u Bah B Swett u la kyrpad ruh ïa u kongsan jong katei ka program ba lada don kino kino ka lad ban ïarap ban plie lynti lem iaki khun samla kiba la pass na kane ka Shlem ba kin ioh iaka kam ka jam.
Ha kane ka sngi la ïoh ban sam ruh ïaki syrnod sha ki 100 ngut eiei samla kiba la pyndep ïaki jinghikai bapher bapher ha kaba ïadei bad ka jing pyntbit haki kam Computer.
