Shillong, Nailur 22: U Myntri ka tnat Department of Information and Public Relations (DIPR) u Bah Lahkmen Rymbui ula ong ba ka tnat ka long kaba kongsan ban sam paidbah iaki skhim bad ki policy jong ka Sorkar Jylla.
Haba kren shaki lad pathai khubor hadien ka jingialang bad ki heh ophisar ka DIPR u Bah Lahkmen ula ong ba haka juk technology ba mynta ka long kaba donkam ban pynkhlain iaka rukom treikam ka IPR khnang ba ki paidbah ki tip iaki jingtreikam ka Sorkar Jylla.
U Bah Lahkmen ula ong ba kum u Myntri u kwah ban pynthymmai bad ban pher ka rukom treikam ka tnat IPR khnang ba ki jingtip (Information) kin poi sted shaki paidbah.
“Haka juk technology bad kiwei ki rynsan Social Media ngi donkam ban pynsted ka rukom sam jingtip (Information) shaki paidbah ka kadei halor ki skhim, ki Policy bad ki jingjop baka Sorkar ka ioh khnang ba ki paidbah kin tip, kumno ka Sorkar Jylla ka treikam” la ong u Bah Lahkmen.
U Myntri ula ong ba watla ka Sorkar naka por shaka por ka ju sam iaki jingtip (Information) shaki lad pathai khubor hynrei, kan long kaba bha eh ba lada ki paidbah ki ioh ruh ki jingtip naka Website jong ka DIPR.
U la ong ba haki sngi ban wan un dang lum shuh shuh ki jingialang bad ki heh ophisar ka tnat DIPR ban wad ki lad lynti kumno ban nang pynkhlain shuh shuh iaka rukom treikam.
