Nongpoh, Nailur 22: Katto katne ki longiing hapoh ka shnong Pahamlang 17mer ha ka thain Byrnihat ha Ri Bhoi, ki la kylla long kum ki lanot shlei um, ha man ba don ka jinghap slap ki ngat beit ha katei ka apot shlei um.
Ka daw kaba la pynlong ia kitei ki longiing, ba kin mad ia ka jingshlei um, ka dei namar ba ka nala ban tuid ka um, ka la rit eh bad kata ka dei hadien ba ha ki bynta ban kham sharum jong katei ka shnong, la ieng kawei ka Weigh Bridge bad kaba la kynnoh ba ka khyndew kaba tuid ha ka jingshna ia katei ka Weigh Bridge, ka la set ia ka lynti ban iaid ka um bad kaba wanrah pat ia ka jingshlei um ha ki iing ki sem.
Lah ruh ban kdew hangne, dang ha kine ki bnai ba la dep, ki la don ki longiing hapoh katei ka shnong, kiba la ngat ha ka lanot ba shah ktah ki iing ki sem bad ha ka sngi Saitjain jong ka Taiew, kitei kijuh ki longing ki la ngat ha ka apot shlei um, kata ka dei ba ia ka nala ban iaid ka um, la seh noh da ka khyndew ha ka por ba pynieng ia ka Weigh Bridge kaba don kham sharum jong katei ka shnong.
Haba pyrshang ban wad jingtip na ki riew paidbah hapoh katei ka shnong, ki la ong, ba ha ki por ba mynshwa kam ju don ka jingshlei um hapoh katei ka shnong, hynrei naduh ka por ba la ieng ka Weight Bridge bad kaba don ruh ka jaka pynhap Mawlein ha ki bynta ba sharum jong katei ka shnong, kaba dei dei ruh ha ki bynta ban ïaid ka wahrit, ka la pynlong ia ki iing ki sem kiba don hadien jong katei ka wah ba ki ngat ia ka jingjia shlei um ha ki iing ki sem.
