Nongpoh, Nailur 08: U Symbud Lamphang ka iing dorbar thawaiñ ka jylla u Timothy D Shira mynta ka sngi u la phah ïaka shithi iehnoh kam, ha kaba la pdiang da u Lamphang ka iing dorbar u Thomas A Sangma bad pynlong ruh ïaka jingïalang ba kyrkieh jong ka Business Advisory Committee ha kaba la rai ban pynlong ïaka elekshon naka bynta ka shuki Symbud Lamphang haka 12 tarik Nailur.
Naka liang u Thomas A Sangma u la ong ba nga la ioh pdiang ïaka shithi iehnoh kam na u Timothy D Shira Symbud Lamphang ka jylla bad la pdiang ruh ïaka jingiehnoh kam, kumta u la khot ruh da ka jingïalang ba kyrkieh ka Business Advisory Committee ban shim ïaka rai ban pynbeit thymmai ïaka calender jong ka Dorbar Synrai khnang ba yn lah ban jied biang ïa u symbud lamphang ba thymmai.
U la Timothy D Shira u la pyntip ruh ba ka jingiehnoh kam jong u naka shuki Dy. Speaker ka dei namar ka jingbthah jong ki nongïalam ka party ban iehnoh kam bad ban iehnoh ïa katei ka shuki bad naka liang u lamphang u la kyntaid ban kren eiei namar kane ka kam jong ka party bad ka dei ruh ka rai jong ki nongïalam ïano ba ki mon ban pynieng kyrtong haka elekshon symbud Lamphang ka jylla.
