Shillong, Nailar 01: Ka Executive Committee (EC) jong ka Khasi Hills Autonomous District Council (KHADC) hynne ka sngi kala leit jurip iaka iew die lang ha Iewduh ban sakhi halor ka jingkynnoh ba dang bteng ka jingot kilo iaki mar rep ba wan die hapoh katei ka iew.
Iaka EC la ialam hi da u Chief Executive Member (CEM) u Bah Shemborlang Rynjah haka jingdonlang ki Executive Member (EM) jong ka District Council.
Ha kane ka sngi u CEM bad ki EM kila ioh ban iakren markhmat bad ki nongrep, ki nongdie bad ki nongkhaii kiba don ha iew dienglang.
Haka jingjurip ka EC kala ioh jingtip ba ki mar rep ba shah ot kilo kidei hi ki mar rep kiba mih na ka Rilum Khasi.
Haba kren sha ki ladpathai khubor u CEM ka KHADC u Bah Shemborlang Rynjah u la ong ba ka jingwan jurip ha Iewduhkadei hadien ka jingpynsngew jong ki nongrep ia ka jingeh kaba mih ruh ka mat ha kaba iadei bad ka District Council.
“Ka jingwan jurip mynta ka sngi kadei hi ban sngewthuh iaka jingeh kaba ki nongrep ki kynduh haba ki wan die iaki mar ha Iewduh bad haki sngi ban wan ka EC kan sa lum ka jingialang ban iathir halor kane ka bynta hashuwa ban shim iaka rai” la ong u CEM.
