Nongpoh, Nailar 01:Ka bor synshar District jong ka Ri Bhoi mynta ka sngi ryngkat ka NITI Aayog ki la shim da ka sienjam ban pynlong ia kata ka Sampoornata Abhiyan Samman ban pynkup burom kyrpang na ka bynta kito ki nongtrei kiba don bynta hakhmat eh ban kyntiew ne wan rah jingkylla ha kane ka District bad ruh ban plied da ka Aakansha Haat kum kata ka ïew ban ailad ia ki paidbah ban pyni nam ia ki tiar bad ki mar rep bapher bapher ba la pynmih na kane ka District Ri Bhoi.
Ia kane ka prokram ba kyrpang la pynlong ha MSCA Pahamsyiem da ka jingwan shim bynta u symbut myntri rangbah ka jylla u Bah Prestone Tynsong kum u kongsan bad la sakhi lang ruh da ka jingdon lang ki MLA ka Ri-Bhoi ba kynthup ïa u Bah Mayral Born Syiem MLA Nongpoh, Dr Celestine Lyngdoh MLA Umsning, Bah Charles Marngar MLA Mawhati, Bah Sosthenes Sohtun MLA Jirang, u Abhilash Baranwal Deputy Commissioner ka Ri-Bhoi, ki nongtrei ASHA, Aganwadi, ki ophisar sorkar bad kiwei ki paidbah nongshong shnong ka Ri Bhoi.
Lynba jong kane ka sngi, la pynkup burom ruh ia ki nongtrei kiba hakhmat bad ki ophisar kiba don bynta hakhmat eh ban kyntiew ia ka Ri Bhoi, kaba dei kawei na ka District kaba ioh ia ka kyrdan District Aspirational District, ba la pynkhamti da ki synod kaba long kum ka jingpynshlur ba kin dang don ka jingkitkhlieh ban kyntiew ia kane ka District.
Haba kren shaphang ka Ri Bhoi District kum kata ka Aspirational District, u Deputy Commissioner ka Ri Bhoi, u Abhilash Baranwal , u la ong ba kum u khliehduh ka District u pynpaw ia ka jingsngewkmen ba ka Ri Bhoi District ka la kiew shaphrang da ka jingdon kito kiba don lang ka jingkitkhlieh ban kyntiew ia kane ka District. U la ong ruh kumba long haduh mynta na ki 4 tylli ki prokram kiba la lah ban pyndep katkum ka thong ka Aspirational District ki kynthup ia ka jingsam ïaki jingbam tei met sha ki longkmie ba armet, ka jingpynbiang bording sha ki secondary school, ka jingsam ïaki kot sha ki khynnah Lower Primary bad ruh ka jingsam ia ki Soil Health Card sha ki nongrep.
U la ong ruh na baroh ki 112 tylli kita ki Aspirational District, ka Ri Bhoi District ka la ioh ha ka kyrdan kaba hakhmat ha ka jngpyntreikam ia ki kam pynroi khamtam ha kaba ia dei halor ka koit ka khiah bad ki jingbam ba tei met. (Health and Nutrition).
Kitei ki MLA ka Ri Bhoi, kiba la shim bynta ha kane ka prokram kyrpang, haba ai jingkren ki la pynpaw ia ka mynsiem jong ka jingkmen ban tip ba ka Ri Bhoi District ka la dang kiew shaphrang ha ki liang ki kam pynroi bad kum ki nongmihkhmat na kane ka District ki khot ki wer ia baroh ban don kata ka jingiatrei lang khnang ban dang lah shuh shuh ban kyntiew ia kane ka District ha ki liang baroh.
U Bah Prestone Tynsong kum u kongsan, haba kren ha kane ka sngi u la ai khublei ia baroh kiba don bynta ban kyntiew ia kane ka District khamtam ka jingioh ia ka kyrdan kum ka Aspirational District ki la wan shibun ki kam pynroi, hynrei ban pyndep lut ia baroh ki thong jong ka Aspirational District donkam ban don ka jingiatrei lang bad ruh ba ki bor synshar District bad ki paidbah ki dei ban bud ryntih ia ki jingbthah na ka NITI Aayog.
