Nongpoh, K’lyngkot 14: Ka Hynniewtrep Youth Council (HYC), Nongpoh Circle ka la leit ban ai syndon da ka jingthoh sha u Superintendent of Police ka Ri Bhoi ban ujor halor ka jingbun ki riew thok ki riew shukor kiba pynbiej ai kam ai jam, die kali bad kiwei kiwei ki kam lyngba ki rynsan Social Media khamtam haka Facebook Page ba bun ki briew ki la shah pynngop ha kine ki kam thok kam shukor.

Ka HYC Nongpoh Circle ha ka jingialam u President u Samla Tony Shylla bad u General Secretary u Samla Nicky Nongsieh ha ka sngi Balang ki la leit ban kynduh ia u Additional Superintendent of Police ka Ri Bhoi bad ki la ai da ka jingthoh sha u Superintendent of Police ka Ri Bhoi ba kin shim khia lem ban tehlakam ia kine ki kam thok bad ruh ban ai ka jingpynshai sha ki paidbah ba kim dei ban beij ia kum kine ki riew shim kabu kiba shim kabu da kaba ai kam ai jam bad ruh ha kiwei kiwei ki kam thok ki kam shukor.

Haba kren sha ki lad pathai khubor, u President ka HYC Nongpoh Circle u Samla Tony Shylla, u la ong ba ka daw kaba la pynlong ia ka seng ban ujor sha ka tnad Pulit halor kine ki kam thok ki kam shukor, ka dei namar ba bun ki la ngat ha kane ka apot bad ki la shah thok shah shukor halor ka jingkular ai kam ai jam, ki kam die kali bad hadien ba ki la ioh pdiang ia ka pisa na kitei ki nongwad kam ki la shu jah pat kumto ha kaba kane ka ktah ia ki paidbah babun ba lang.

Shuh shuh, u la ong ruh ka daw ba ka seng ka pynsngew sha ka tnad Pulit ka Ri Bhoi, ka long ban kyrpad lem ban shim khia halor kine ki kam thok ki kam shukor bad lada long kaba lah kin ai ka jingpynsngewthuh paidbah ba kito ki samla wad kam wad jam kim dei ban beij klumar, namar kumba ka seng ka la ioh lum jingtip bun ki samla ki la shah pynngop bad shah thok halor kine ki  jingkular ai kam ai jam lyngba ki rynsan social media, u la bynrap.