Mawkynrew, Naiwieng 19: Kum shibynta ha ka prokram “Boys Grow Wise”-Campaign under Child Safety Week, lyngba ka Focus Group Discussion (FGD) hynnin ka sngi ha ka Shnong Syntung la pynlong ia ki jingai jinghikai (awareness) iaphylliew jingmut markylliang (interaction), ryngkat ki jingiasyllok (counselling) ba la wan ban shim bynta da ki khynnah ap masi, ki trai masi, ki kmie ki kpa, ki khun samla ryngkat ki nongshong shnong ka Syntung, East Khasi Hills District, ba hap ha ka Mawkynrew Block.
Ka ne ka prokram bala pynlong kyrpang bad kaba dei ruh ha ka sien kaba nyngkong tang ia ki khynnah shynrang kiba ap masi ka dei kaba la pynlong da ka ophis jong ka National Health Mission (NHM), ka Sorkar Meghalaya, ka jingbthah na ka Sorkar India lyngba ka prokram ‘Rashtriya Kishore Swastha Karyakram’ (RKSK) ha ryngkat ki jingiasnohkti lang ka ‘Step Phyrngap Integrated Cooperative Society (SPICS) Ltd, Thynroit’, East Khasi Hills, Mawkynrew Block & ka Durbar shnong Syntung.
Katei ka sngi ka la long kaba jop lyngba ka “One Day Awareness Programme for COWBOYS on Health, Hygiene & their Futuristic Empowerment-MPOWER”.
Ha kane ka sngi la pdiang burom da u Rangbah Shnong Syntung u bah Robert Pale. La ai jinghikai bad batai shai halor ki jingmut bad jingthmu jong ka ne ka prokram da ka Kong Flourish Lyngdoh, kum ka RKSK Program Officer (Rashtriya Kishor Swasthya Karyakaram)
La sakhi bad iaphylliew jingmut lem ha ka jingdon ryngkat u Dr. Evarist Myrsing, u Chairman jong ka Step Phyrngap Integrated Cooperative Society (SPICS) Ltd, Thynroit, EKH Mawkynrew Block. La ia don lang ruh ki riewshemphang na ophis ka koit ka khiah kiba kynthup ia u Bah Daewon Nongrem, u ba long kum u Asst. Manager – Mental Health (MPOWER), ka kong Larisa B. Dohtdong, ka Asst. Manager – Health (MPOWER) bad ka kong Ibaiarlin Tham, kum ka Project Coordinator- Health, MPOWER.
U Dr. Evarist Myrsing u la ban jur ba ka jingkoit jingkhiah ka dei kaba hakhmat eh, khnang ba ngin lah ban pule kot bha, ban rep ban riang, ban ri jingri bad trei ki kam ruh kham bha. Lada ngim koit ngim khiah ha ka met ka phad, ki jingmut jingpyrkhat bad khamtam ka jingban ka jingduk ha ki khynnah ap masi; kumno kin lah ban sharai ia ki masi? namar ka kam ri masi ha ri Khasi hi ka long kaba eh ym kum sha ki ri nongwei.
U la kyntu ia ki khynnah ap masi, ki kmie ki kpa bad ki trai masi ba kim dei ban long mawjynthud ha ka jingim jong ki khun jong ki ban long sah tang ki khynnah ap masi. Hynrei ki dei ban don ka jingkitkhlieh ban pynnang pynstad katba lah sha ki skul sorkar ba jan eh, ban phah/ ai ki lad jingsumar sha ki PHCs center ban check up man la ka por, pynbiang ia ki jingbam ba tei bad ym dei ban ailad ba ki khynnah kin ngop ha ki jingdih buaid/duma, ka jing ia shongkha khynnah bad kim dei ban kmen tang ba lah ioh pisa wat lada ki dangrit ka rta.