Nongpoh, 19 Naiwieng: Ki nongialam ka Federation of khasi Jaintia and Garo people (FKJGP) Baridua Circle, ia kaba la ialam da u Denis Nongrum, President ha ryngkat bad ki dkhot, mynta ka sngi, ki la leit ban jngoh ia iwei i Meirad iba la tip kum i Thai Sangma kaba shong ba sah ha ka shnong Noksikgittim Kiling, ka shnong kaba hap ha Raid Marwet, Ri Bhoi.

Ha katei ka sngi, ba kitei ki nongialam ka FKJGP ki la leit jngoh ia itei i Meirad, ki la ai ruh da ki jingai sngewbha ha ryngkat ka pisa, ha kaba ka nongrim kaba la pynlong ia kitei ki nongialam ka FKJGP ba kin leit jngoh bad ai jingiarap ia itei i Meirad, ka dei hadien ba ki la ioh jingtip, ba itei i Meirad, i dei iba la im tymmen tam bad iba la kot sha ka 140 snem, kata na ka snem kaba la shu antad.

Kumba la iathuh da ka Drith Sangma, 82 snem ka rta bad kaba dei ka khun basan jong i Meirad Thai Sangma, la ong ba i Meirad Thai Sangma, i dei iba na ka shnong Balat bad i poi sha ka thain Killing da kaba wan bud ia u Lok, nalorkata i don 12 ngut ki khun bad mynta kiba im ki don sa tang 4 ngut.

Na 12 ngut ki khun, hynrei kumba ka long mynta, ka kharoi haduh 400 duna, kata kaba kynthup naduh Ksiew, khun Miaw bad khun Khnai bad kumba ka long mynta, hapoh ka shnong Noksikgittim, ki dei tang ki briew kiba mih na ka Kpoh jong u Meirad Thai Sangma, ha kaba na ki 212 tylli ki longiing, don tang 2 tylli ki longiing ki bym dei na ka kpoh i Meirad Thai Sangma.