Shillong, Rymphang 16: Kum ki Samla rangbah ka dong Ri Bhoi bad mynta ki la long kum kita ki nongmihkhmat paidbah na Ri Bhoi District, u Bah Charles Marngar, MLA ka Mawhati bad u Bah Mayral Born Syiem MLA ka Nongpoh mynta ka sngi ha ka ‘Obituary Reference) jong ka dorbar mang tyngka kaba la sddang mynta ka sngi, ki la kren bad phah ia ka khubor sngewlem halor ka jingkhlad noh u (L) Dr. D. D Lapang kum u Myntri barim ka jylla bad u MLA barim ka Nongoh ba kane ka jingkhlad noh une u nongialam ka la long ka jingduh nong kaba khraw kyrpang ia ka Ri Bhoi bad wat ia ka jylla Meghalaya.
Kum ban pynkynmaw, u Bah Charles Marngar bad u Bah Mayral Born Syiem, ki dei ki Samla rangbah na Ri Bhoi kiba ju don ha syndah jong u Dr. D.D Lapang bad ka jingpoi jongki sha ka kam nong mihkhmat ruh ka dei ka jingialam lynti jong u Dr. D.D Lapang ha kaba ki la shim ruh ia u Dr. D. D Lapang kum u nongialam bad u nonghikai ha ka lynti iaid jong ka jingim jongki.
Haba phah khubor sngewlem sha kiba haing hasem u Dr. (L) D.D Lapang, kitei ki 2 ngut ki nongmihkhmat na Ri Bhoi, ki la pynpaw ba ka jingkhlad noh u Dr. D.D Lapang kum u nongialam ba paw ka Ri Bhoi kam dei ka jingduh nong tang ia ka ing ka sem jong bad ka jingduhnong ka long ia ki shimet bad wat ia ki paidbah ka Ri Bhoi District.
“Kawei na kaba ki la pynpaw halor ka jingduh nong na ka jingkhlad u D. D. Lapang, ka dei kaba ki la shim ia u kum u kpa bad u nonghikai ban phrang ia ka jingim jongki. Ka skul kaba ki la pas ban poi sha ka thong jong ka jinglong MLA ruh ka dei na ka skul ba la tip kum ka Dr. D.D Lapang School” ong u Bah Charles Marngar.
Kum ki nongialam kiba la kiew shaphrang ha ka jingim na ka jingbtin lynti u Dr. D. D Lapang, u Bah Charles Marngar bad u Bah Mayral Born Syiem, ki la pynpaw halor shibun ki jingiaid lynti u Dr. D.D Lapang kum u nongshakri paidbah bad ki da pynpaw ruh ba ka da long shisha ka jingduh kaba khraw halor ka jingkhlad noh une u nongialam ba ka Ri Bhoi ka dang donkam ban mih kum kine ki nongialam ban kyntiew ia ka dong ka thain bad ha ka jylal hi baroh kawei.