Nongpoh, Nailur 19: Hadien bun sngi ba kawei ka longiing kala mad ïaka jingeh kaba khraw, namar ka jingban jong ka jingduk jingkyrduh haduh ba ki hap ban shah thngan bun sngi, ka Federation of Khasi Jaiñtia and Garo People, Umling Circle hapoh ka jingïalam u Samla Banroy Wahlang President ryngkat ka jingïatreilang bad ka Umsohma Unit lem bad ki dkhot mynta ka sngi kila leit sha ka shnong Umsohma, ban noh synñiang da ki marbam mardih kum ka jingdon bynta lem ban kyrshan ïa katei ka longiing.
Katei ka longiing ka dei jong u Bah Ashik Marak bad ka kong Sunita Ranee kiba don ruh 2 ngut ki khun, bad katkum ka jingïathuh jong u Secretary Shnong Bah Turban Lyngdoh katei ka longiing kala mad shisha ka jingeh kaba khraw namar ka jingduk jingkyrduh bad kum ka shnong ka pynpaw ka jingsngewnguh halor ka jingshimkhia jong ka FKJGP Umling Circle ban synei lem ïa katei ka longiing lyngba ki marbam mardih.
Na ka liang u Bah Banroy Wahlang kum u President ka Circle, u la ong ba ka daw kaba la pynlong ia ka seng ban ai jingiarap da ki marbam sha kane ka longing, ka dei hadien ba ki dkhot ka seng ki la pyntip halor ka jingshem jingjynjar katei ka longïing kaba dei na ka daw ka jingban ka jingduk jingkyrduh bad kum ka seng ka iarap da ki marbam ka long shi bynta ban ia tynrong lem halor ka jingeh ba ia kynduh da katei ka longïing.
Shuh shuh, kumba la pynpaw da ki dkhot bad ki nongialam shnong halor ka jingeh katei ka longïing la lap shisha ruh ha kane ka sngi, ba kane ka longïing ka donkam ka jingiarap ha kaba kum ka seng ruh ka kyntu ia k sorkar bad ki nongmihkhmat ban phai khmat lem sha kane ka longïing kaba donkam shisha ia ka jingiarap.
