Nongpoh, Nailur 19: Ka jingangnud ki paidbah jong ki ar-phew tylli ki shnong, kiba don ha ka thaiñ Umtyrnga, ban ïoh ia ka jaka sumar kaba biang na bynta kipaidbah, ka la wan ban urlong bad kata ka dei ba mynta ka sngi, u Sosthenes Sohtun, kum u Myntri ka tnad ba peit ia ka Community & Rural Development bad u MLA Jirang, u la leit ban plie paidbah ia ka Health Sub Centre, kaba la tei hapoh ka shnong Umtyrnga, Ri Bhoi, kaba dei kawei na ki shnong khappud hapdeng ka Meghalaya bad Assam.
Haba plie ia katei ka Sub Centre, nalor ka jingdon utei u Myntri sorkar, la sakhi ruh da ka jingdon u Abhilash Baranwal, Deputy Commissioner ka Ri Bhoi, ka Dr. A.J Syiemlieh, District Health Surveillance ha Ri Bhoi, u Bah Migalan Marbaniang, Rangbah Shnong Umtyrnga, kiwei ki nongtrei ka koit ka khiah bad ki riew Rangbah jong katei ka thain.
Ki shnong ki ban sa ïoh jingmyntoi na katei ka Sub- Center, ki kynthup ia ka shnong Umtyrnga, Iongkhuli, Chibra, Mawiong, Barapathar, Lalmati, Behennodi, Nagrabil, Umsem, Umlathu, Pynker ABC, Pahamjula, Jyrmang AB, Pillingku AB, Kamalbari AB, Jorsyiem, ha kaba ki paidbah kin sa ïoh ia ka jingshah sumar bad khamtam eh na bynta ki longkmie bad ki khyllung rit.
Ia katei ka Sub Centre, la tei ha ka jinglut kaba la kot sha ka T. 55 lak, ha kaba la shna bad pynwandur janai bha da ka Umtyrnga Village Health Council (VHC).
Haba ai jingkren ha katei ka sngi, u Bah Sosthenes Sohtun, la kyrpad ia ki nongtrei, ki ban sa trei hapoh katei ka Sub Centre, ba ki dei trei bha bad ym dei ban mih kano kano ka jingshah kynthoh halor ka jingtorti ka rukom treikam ha Umtyrnga Sub Centre, khnang ba katei ka Sub Centre, kan da long shisha ka ban ai jingmyntoi ia ki paidbah jong katei ka thain, kaba dei ruh ka thain kaba don ha khappud hapdeng ka Meghalaya bad Assam.
Nalorkata, u la kyntu ruh ia ki paidbah kiba leit ban shah sumar hapoh katei ka Sub Centre, ba ki dei ban sumar bad lehkhuid bha, khnang ba katei ka jaka ai jingsumar, kan long kaba neh slem bad ba kan ïoh ruh ia kata ka nam ka burom, ba kan long kum kawei na ki Sub Centre, kaba biang tam, la ka long na Jirang Constituency, hapoh ka District bad ha ka jylla hi baroh kawei.
Ha katei ka sngi, ba la plie ia katei ka Sub-Center, la don ruh ka jingsumar ei ia baroh ki jait jingpang, ia kaba la wan da phi briew ka koit ka khiah na Ri Bhoi lem bad na PA Sangma International Medical College.
