Baridua, Lber 04: Ki bor ka PA Sangma International Medical and Hospital (PIMC) ha ka Skulbah jong ka University of Science and Technology Meghalaya, mynta ka 4 Tarik u Lber ki la pynlong da ka jingrakhe kaba kyrpang ban kynmaw burom ia ka lyngkhuh snem kaba 9 ka jingkhlad noh jong u PA Sangma (Bam Kwai ha Dwar u Blei) u ba la long teng kum u Speaker ka Lok Sabha bad u Myntri Rangbah ka jylla Meghalaya.
Ha kane ka jingrakhe la ia donlang da u Professor GD Sharma, Vice Chancellor ka USTM, Padma Shri Dr. Sarbeswar Sahariah, Vice-Chancellor ka USTM, Prof. Dr. Abhinandan Das, Principal jong ka PIMC; Dr. RK Sharma, Advisor jong ka USTM, Dr. Jogesh Sharma, Director jong ka Medical Education and Research, ki doctors, samla pule nalor kiwei kiwei.
Haba kren ha kane ka sngi, u Prof. GD Sharma, u la pynpaw ia ka jingsngewnguh kaba khraw ia ki matti bad u synniang ba la bei da u PA Sangma na bynta ka jingpynurlong ban pynlong ain ia ka USTM Act hapoh ka Meghalaya Legislative Assembly ha u snem 2008 kumjuh halor ka jingiohi jngai ka jong u ban pynwan dur ia ka lawei ki samla lyngba ka pule puthi.
“U PA Sangma Bam Kwai ha Dwar u Blei u la long shisha u ba la ai mynsiem shikatdei na bynta ka USTM bad ngi sngew dapram na bynta ki jingnoh synniang jong u na bynta ban tei pynieng ia ka skulbah hapoh ka jylla Meghalaya”, ong u Prof Sharma, da kaba ai khublei kyrpang ruh ia u Conrad K Sangma, Myntri Rangbah ka jylla Meghalaya u ba dang bteng ban iai kyrshan ia ka USTM ha kiba bun ki liang.
