Nongpoh Naiwieng 13: Ki Samla pule ka Balawan college Umsning ha Ri Bhoi District mynta ka sngi ki la pynkut noh ia ka taiew lehkmen jong ki samla pule bad ba la tip ruh kum ka Annual Balwanian’s week Celebration ba la buh halor ka phang Phang “Rising With Vision”.

Ia kane ka jingpynkut noh ia ka taiew lehkmen ki samla pule la wanban pynkut noh da u Bah Lakmen Rymbui, u Myntri sorkar ba dei peit ia ka tnad pule puthi bad la sakhi lang ruh da ka jingdon lang u Fr. Pius Shadap, Parish Priest ka Umsning Parish, u Bah J. Kurbah, Principal ka Balawan college Umsning, ki nonghikai lem bad ki samla pule.

Kum ka jingpynphuh pynphieng ia kane ka taiew lehkmen ba la pynkut noh, ki samla pule ki la shim bynta ha ki jingshad, ki jingrwai bad kumjruh ha ka jingialop Miss bad Mr Balawan College, ba la iohi  ba ka la pynkhih met bad pynshongshit ia ki samla pule kane ka College.

Haba phai sha ka jingiakop thei bad rang bha briew kiba kynsai tam na kane ka College, ïaka nam Miss Balawan college la rah da ka samla Pdianghun Mukhim bad ïaka nam Mr Balawan college la rah da u Samla Augfrintin Kharlakhar.

Haba ai jingkren kum u kongsan, u Bah Lakmen Rymbui u la ai ka jingiaroh ia ki bor pyniaid ka Balawan College kiba la pynlong kum kane ka lympung ban ailad ruh ia ki samla ban sei madan ia ki sap ki phong nalor ka kam pule dangle jongki.

U la ong ruh ka jingpynlong kum kane ka lympung ka wan rah ruh ka jingiatylli hapdeng ki samla pule bad ki bor pyniaid jong ka College na ka bynta ban dang lah shuh shuh ban kyntiew ia ka jingnang jingstad ki khun samla kiba dei katkum ka juk stad ba mynta.

Shuh shuh, u la ong ruh ba ka jingpule kam dei than tang ha ki saw kynroh jong ki kamra klas bad kum ki samla pule ki donkam ban pyngngad jabieng bad ki jingmut jingpyrkhat shabar jong ki saw kynroh jong ki kamra klas knhang ba ki samla pule kin ioh ban palei ia ka jingmut jingpyrkhat.