Nongpoh, Naiwieng 13: Ki pulit ka Ri-Bhoi District, ha ka jingtalasi kali kaba la long hynnin ka miet ha Umling, ki la ïoh ban dain kuna haduh T.6 lakh eiei ïa ki nongpynkheiñ aiñ ha surokbah National Highway, kiba kynthup ruh ïa bun ngut ki nongñiah kiba la buaid kyiad.

Kane ka jingtalasi ba bteng jong ki pulit ka long kum ka jinghikai bad jingmaham paidbah, khnang ban pynsngewthuh ïa ka jingdonkam ban bud ïa ki kyndon aiñ ha ka por ba niah kali, ban lait na kino kino ki jingjia ba sngewsih, khamtam kiba ïadei bad ka jingduh mynsiem briew ha surok.

Watla ki pulit ki la ju maham man ka por, hynrei ki dang don shibun ki paidbah kiba dang bym pat bud ïa ki aiñ niah kali, khamtam kito kiba niah kali ha ka por ba dih kyiad. Naduh ba la sdang ka jingtalasi naduh ka por 6 baje janmiet, ryngkat ka jingïatreilang bad ka Seng Samla Umling, ki pulit ki la ïoh ban dain kuna haduh T.6 lakh, bad la ong ruh ba kane ka jingtalasi kan dang iai bteng man ka por ban pynsngewthuh shuh shuh ïa ki paidbah.

Halor kane ka jingtrei shitom jong ki pulit, ka Seng Samla Shnong Umling, lyngba u Samla Reminold Mawrie (President) bad u Samla Banteiborlang Kshiar, ka la ai ka jingiaroh bad ka jingkhublei ïa ki pulit ka Ri-Bhoi hapoh ka jingïalam u SSP VS Rathore bad u Additional SP Bah Orville Massar, kiba la shimkhia ban mih paidbah ha surok ryngkat ki pulit ophisar bad langrut, ban pynthikna ba ka surokbah kan long kaba shngaiñ bad suk na bynta ki paidbah kiba leit bad wan man ka sngi..