Shillong, K’lyngkot 15: Ym lah ban tip na kaei ka daw bad la suba ba ka lah ban dei na ka jingthud ka bording iletrik, kawei ka kamra ba buh tiar sport ka sport Department mynta ka step ha ka por 7 baje ei ei ka la kem ding kynsain bad na kane jingjia ka ding ka la bam pynjot bad bam duh lut ia kitei ki tiar sport ba don hapoh ka kamra.

Kane ka kamra ba buh tiar sport ka Sport department kaba la kem ding kynsan mynta ka step ka dei building jong ka Shillong Government College of Engineering kaba don ha Mawlai Kynton Massar, Shillong ba ka sport department  ka la shu pyndonkam shipor ia katei ka building na ka bynta ban buh ia ki tiar sports.

Haba ia kren bad ki Nongthoh Khubor, u Principal ka Shillong Government College of Engineering, Shillong, u Bah C. Myrthong u la iathuh ba ym lah ban tip ia ka daw tynrai jong kane ka jingpluh bad kam ding kynsan katei ka kamra bad la suba ba ka lah ban dei na ka jingthud ka bording ilektrik.

U la iathuh ruh tang mar ia ioh jingtip halor kane ka jingjia, u la leit mardor sha katei ka jaka bad la ia pyrshang ban pynlip ia ka ding da kaba synreit da ka fire extinguisher, hynrei namar ba katei ka kamram la khang tala ym shym la lah leh ei bad dei haduh ba la wan poi ki Kali pynlip ding ba la lah ban pynlip noh ia katei ka ding kaba la pluh hapoh katei ka kamra.

U la iathuh ruh ba kane ka kamra ka dei kaba pyndonkam da ka sport department shipor ban buh ia ki tiar sports bad um lah ban tip kiei ki jaid tiar ba buh da ka sport department bad na kane ka jingpluh ding ka ding ka la bamduh ia kitei ki tiar ki tar jong ka sport department.

Shuh shuh, u la iathuh ruh halor kane ka jingjia na ka liang ka Shillong Government college of Engineering kin sa ujor da ka ejehar sha ki pulit halor kane ka jingpluh ding katei ka kamra na ka bynta ka jingtohkit kaba bniah bad ruh u hap ban da ai jingthoh sha ka tnad MeECL ban wan peit wan khmih ia ka jinglong jingman ka bording ilektrik, namar ha kane ka jingpluh jong katei ka kamra la hap ban pynlip ia ka bording ilektrik.