Nongpoh, Kyllalyngkot 14: Da ka jingkmen kaba khraw ba kum ka kynhun jong ki longkmie ka Kyntiewlang Village Organization kaba kdup ruh ïa ki 7 tylli ki SHG’s jong ka shnong Korstep Nonglyngdoh, mynta ka sngi ka la pynlong ïa ka jingrakhe kaba iphuh iphieng ïa ka jingdap 6 snem haka jingïaid lynti kum ka Village Organization ba ka la ai ïa ka jingshakri na ka bynta ka imlang ka sahlang.

Ha kane ka sngi kyrpang, naka liang ka Village Organisation ki la ioh ban plie syndon iaka Shlem treikam jong ka kaba la tei itynnad bha haka jinglut kaba 7 lakh 30 hajar tam lyngba ka skim MGNREGA ha ryngkat ka jingtei ruh iaka jaka pynlang um slap jong katei ka Ophis.

Ïa katei ka Ophis thymmai la wan ban plie noh da u Bah Mayralborn Syiem  MLA ka Nongpoh kum u kongsan haka jingdon lang ka Lalchandami Marak JRDO Umling Block, Bah Wanborlang Malngiang Cluster Co-ordinator, Kong Veronika Syngkli President ka Kyntiewlang Village Organisation Korstep Nonglyngdoh, bah Andreas Makri Rangbah Shnong Korstep Nonglyngdoh, Bah Isaïa Syngkli Rangbah Shnong Korstep Nongtluh lem bad kiwei kiwei.

Haba kren ha katei ka jingialang bah Mayralborn Syiem kum u ai ïaka jongïaroh ïaki nongialam jong ka Kyntiewlang Village organization ki ba la lah ban pyntyllun ïaki kam mynta la 6 tylli ki snem khlem da don kano kano ka jingnoh shilliang khmat. U la ïaroh ruh ïaki dkhot jong ka VO bad kumjuh ïaki dkhot jong ki 7 tylli ki SHGs kiba la snohkti lang ban ïa kyntiew iwei ïa iwei khlem da don ka mynsiem ia bishni.

U Bah Mayralborn u la ai ka jingiaroh ruh iaki Longkmie dakaba ong, Ka jingnoh synniang jong ki Longkmie haka imlang ka sahlang ka dei ka bym lah ban siew kylliang, namar haba ki Longkmie ki leh ia kano kano ka Kam ki leh naduh ka Mynsiem bad ki Longkmie ki don ruh iaka mynsiem kaba shisur shidur.