Shillong, K’lyngkot 15:  U Myntri rangbah ka jylla u Conrad K. Sangma mynta ka sngi u la ong ba ngi donkam ia kata ka jingiamir jingmut ne ka jingiahun lang ban wan rah ia ka surok Rel ha rilum Khasi-Jaintia bad kren shai ruh ba ngin sa iaid shakhmat ban wan rah ia ka surok Rel tang lada ngi la ia mir jingmut lang bad ruh baroh kin ai ia kata ka jingiamynjur lang.

U Myntri rangbah u la pynpaw ruh ia ka jingsngewkhia kaba jur, ba bun ki Political party ha ka jylla kim shym la wan ban shim bynta ha ka jingialang ba la pynlong ban ia rai ne ia thir halor ka jingdonkam ban wan rah ia ka Surok Rel sha ka jylla.

Haba pynpaw halor kane ka mat ka jingdonkam ia ka surok Rel, U Myntri Rangbah ka jylla u Conrad K. Sangma u la buh ruh ia ka jingkyrpad ia ki Political party kiba don ha ka liang pyrshah ban shim bytna ha kane ka jingiamir jingmut halor ka surok Rel, da kaba ong, “ kiwei ki political party lada ki mynjur ne kim mynjur ia ka surok Rel, ngi donkamban ia kren bad lada ka long ha kane ka rukom ngin nym poi sha kano kano ka jingiakren ha kaba ia dei bad ka Surok Rel”.

U Sangma u la batai ruh ba ka thong jong ka sorkar halor ka surok rel, dei ban don bynta lang na ki liang baroh ban ia kren ne ia thir sani bad bynrap ruh da kaba ong ba ka sorkar kan dang bteng ban pynshai sha ki paidbah shaphang ka jingiohnong ka surok Rel bad ba ia kren ruh halor kiwei kiwei ki mat kiba ktah bad dei tang lada ngi ia kren lang na ki liang baroh ngi lah ban ai ia ka rai sha ka sorkar ha Delhi”.

U la ban khia ruh da kaba ong, ba ka surok Rel ka long kaba donkam ban kyntiew ia ka ioh ka ka kot bad ka dei pat kaba bynta kaba kham ktah ha kaba donkam ban don da kata ka jingiamir jingmut lang na baroh ki liang.

Shuh shuh, u la bynrap ruh da kaba ong ba ka Sorkar ka la dep ban thung da ka All Party Committee  ban ia thir halor ka surok Rrel, hynrei don pat ki Political Party kiba kyntait bad kiba ym shim bynta sata haba ia kren ne ia thir halor ka surok Rel, u la bynrap.