Shillong, K’lyngkot 15: U Myntri rangbah ka jylla, u Conrad K. Sangma mynta ka sngi u la iathuh ba ka sorkar jylla ka la trei shitom ban pynsted ia ka kam na ka bynta ban pyndep noh ia ka jingker sainar ha ki Khappud ka India bad Bangladesh ba hap ha ka jylla Meghalaya.

Haba kren sha ki lad pathai khubor, u Conrad K. Sangma u la ong la ong ha kaba ia dei bad kane ka jingker sainar ha ki Khappud ka India bad Bangladeh, ka sorkar India ruh ka la buddien bha ha ki jingpyntreikam ha ki khappud ba hap ha jylla Meghalaya.

U la pynpaw ruh da kaba ong, “Ngi la trei shitom ban pyntreikam janai bad kyrmen skhem ba ka kane ka jingker sainar ha Khappud ka Bangladesh bad ka India yn lah ban pyndep noh kham kloi”.

U la ong ruh na ka 440 km ka jingker sainar ha khappud ka Bangladesh kiba dang sahkut bad kiba ym pat lah ba pyndep ka dei sa tang 40km, kata ruh ka ka dei namar ba dang don ki jingthud kum ka jingpyrshah ki nongshong shnong, ka jingsiew ia ka bailut ksan jaka bad kiba dang don ruh ha ka jingbishar ka ïingkashari.

Haba kren pat halor ka jingdonkam ban peit pyrman ha kitei ki shnong khappud bad ka Bangladesh, u Myntri rangbah ka jylla u la ong, ba ka sorkar jylla, ki BSF bad kiwei ki tnad iada ri ki long kiba peitngor bad kiba pyrkhing bha ha kitei ki bynta jong ka khappud ka Bangladesh.

Shuh shuh, u la pynpaw ruh ba la don ruh ka jingialang kyrpang ha ka 24 tarik u Noprah 2025 ha kaba la shim bynta ki tnad sorkar iada ri naduh ki BSF, IB bad kiwei kiwei kiba ia ia kren na ia tai sani na ka bynta ka jingshngain ha kitei ki khappud ka Bangladesh, u la bynrap.