Nongpoh, Lber 4: Da ka jingioh jingtip kaba bniah na ka tnat Excise Assam, ka tnat Excise na Ri Bhoi, ha ka jingbthah u Commissioner ka tnad Excise, ha ka sngi u Blie ha ka por 1,30 pm ka la pynlong ïa ka jingkhynra ha ar tylli ki jaka ba la suba ba ka don ka jingshna kyiad beaiñ bad la ioh ban kurup ia kawei ka jaka shna kyiad beaiñ ha Shillong By-pass hajan Umiam.
Ha kane ka jingkhynra, kawei na ki jaka ba don marjan bad Shillong Bypass ha Umiam la lap ba ka don ka jaka shna kyiad beañ ha kaba la ioh ban kurup shibun ki tiar ki tar ba ki pyndonkam ha kaba shna kyiad bad kawei pat ka jaka ha Industrial Complex Umiam kim shym la lap satia ia ki tiar ki tar ne kata ka jaka ba ki shna kyiad.
Kane ka dei ka jingleit khynra ka dei kaba la iatrei lang bad ka tnad Excise Assam bad Meghalaya, kaba dei hadien ka jingioh bat kawei ka trok kaba don ia u number AS-11-AC-9144 ha Khanapara bad lyngba ka jingioh kem ia kane ka Trok ka la pynlong ia ki ban ioh ban leit khynra ia katei ka jaka shna kyiad beain ha Shillong By-pass.
Haba kren mynta ka sngi sha ki lad pathai khubor, u Superintendent ka tnad Excise na Ri Bhoi, u Bah R.C. Lyngdoh, u la pynthikna ba ka dei shisha ka jingleit khynra ia kawei ka jaka shna kyiad beaiñ ha Shillong By-pass hajan Umiam bad kane ka jinglah ban leit khynra ka dei lyngba ka jingiatrei lang ka tnad excise bad ki bor pulit na Umiam Police Station.
U la iathuh ruh ha kane ka jingleit khynra, ka tnad excise ka la ioh ban kurup ia ki tar ki tar bapher bapher naduh ki kor ki bor kiba ki pyndonkam ha kaba shna kyiad beaiñ kum kta ka Blending tags, storage tank, capping machine, production lines, ki flavouring bad colouring agents bad ruh kata ka Counterfeit hologram jong ka Assam bad Meghalaya.
La ong ruh na kane ka jingleit khynra, ki la ioh ruh ba kuru pia ka kyai dba la dep shna naduh ka OC, OC Blue, Royal Stag, bad McDowell’s No.1, ba la kot sha ka 23000 bilor. Nalor kata, la ioh kurup ruh ia kata ka Label excise jong ka Meghalaya bad Assam, lem bad ki bilor ba la thylli bad ruh ki Carton ba ki song kyiad ha kaba ka tnad excise ka la kurup lut ban buh ha ka jingpeit jingkhmih jongkai (excise custody), u la ong.
Shuh shuh, u Superintendent ka tnad Excise na Ri Bhoi, u Bah R.C. Lyngdoh, u la ong ba hadien ka jigngleit khynra bad ba la ioh kurup ia kitei ki sakhi ba ki shna kyiad beaiñ, ki la wad jingtip ruh ia ki briew ba don kti ha kane ka kam kaba kim pat ioh jingtip satia bad ha kawei ka bynta ki dang pynlong ia ka jingtohkit bad lada ki la lap ia ki briew ba don kti kin sa ujor sha ki bor ka aiñ khnang ban pynshitom katkum ki kyndon aiñ hapoh ka District and Session Court, Nongpoh, u la bynrap.
