Nongpoh, Lber 03: Kawei ka masi ka la iap hadien ba ka la shah bat bording elektrik na u transformer ba khlem jingker ha shnong Warmawsaw, ha ka thaiñ Ri-Bhoi Sepngi.
Katkum ki khubor ba la ioh lum, kane ka jingjia ka la jia mynta ka sngi ha kaba la suba ba katei ka masi ka la leit ban bam phlang ha katei ka jaka bad ka la shu leit marjan bad u transformer ba khlem jingker haduh ba ka la shah bat bording bad iap syndon hashen.
U Samla Armour Mawblei, President ka RBYF Warmawsaw Circle, u la pynpaw ka jingsngewkhia kaba jur halor kane ka jingjia bad u la ong ba kane ka dei ka jingbym shim khia ka tnad MeECL. U la kynnoh ba ka tnad ka la buh ia utei u transformer khlem da ker ne jingda, kaba pynlong ia ka jingma kaba khraw ym tang ia ki mrad hynrei wat ia ki briew ruh, kaba lah ban wanrah ia ki jingjia ba sngewsih ha kano kano ka por.
Shuh shuh, ha kaba iadei bad katei ka jingjia, ka seng ka la buh por san sngi ia ka tnad MeECL ba kan dei ban ker mardor ia utei u transformer khnang ban iada na ki jingjia ba sngewsih ha ki sngi ban sa wan.
