Nongpoh, K’lyngkot 07: Ka Ri Bhoi Tourism and Environmental Developmental Forum (RBTEDF) ka la mih shakhmat ban maham ia ki paidbah ha Ri Bhoi District ba kim de ban pynjot pathar ia ka mariang, hynrei ban don lang kata ka jingkitkhlieh ban iada ia ka mei mariang.

Kane ka jingmih katei ka Forum ban maham ia kiba pynjot pathar ia ka mariang, ka dei ruh hadien ba mynta la sdang ban kynjoh sha ka aiom tyrkhong ba bun ki riew shim kabu ki thang klumar ia ki khlaw, ki siat pathar ia ki mrad bad ki pyniap pathar ia ki doh um doh wah da kaba wieh dawai khlem da don kata ka jingsngew ban iada ia ki jingdon jingem na ka bynta ka pateng ban sa wan.

Haba ia kren mynta ka sngi bad u President ka RBTEDF, u Bah Plielad Tiewsoh u la ong ba ka  Forum ka sngewkhia shisha ban iohi ba dang bun ki briew ki bym pyrkhat satia ia ka mei mariang, ha kaba ki pyniap pathar ia ki mrad, ki thang klumar ia ki khlaw bad ki pyniap ia ki kynja doh um kiba don ha ki um ki wah da kaba wieh dawai bad kiwei kiwei ki jingpynjot iaka mariang.

U la ong ba na ka liang ka Forum ka kyntu jur ia ki nongialam shnong, ki nongialam Raid bad ki nongialam Hima ryngkat ki riew paidbah bad ki nongialam bapher bapher ban don kata ka jingiatr lang na ka bynta ban khang pyrshah ia ki riew dusmon ba pynjot mariang bad kum ki nongshong shnong ki hap ban don ka jingsngewthuh ba ka jingpynjot iaka mariang ka ktah ia ka pateng ban sa wan jong ki khun ki kti ne ka jaid bynriew.

Shuh shuh, u la kypad ruh ba lada don kino kino kiba ialeh pyrshah ban pynjot pathar ia ka mariang da kaba pom ne thang ia ki khlaw, ki jingwieh dawai ha ki wah bad ka jingpyniap ia ki mrad, ki de ban pyntip sha ka tnad Wild Life ne sha ka tnad Forest bad na ka liang ka Forum lada ka lap ia kino kino ki riew dusmon ban pynjot ia ka mariang kan nym map bad kan aiti beit sha ki bor ka ain, u la bynrap.