Nongpoh, K’lyngkot 09: Da ka jingkhmih lynti ban dang kyntiew ia ki kam rep ki kam riang kiba long katkum ka juk stad mynta bad ruh ban phai khmat kyrpang sha ki nongrep, ka Indian Council of Agricultural Research (ICAR), Umiam mynta ka sngi k ala rakhe ia ka jingiaid lynti kaba 51 snem ba kane ka tnad treikam ka la shakri na ka bynta ban kyntiew ia ki kam rep ki kam riang ha ka jylla Meghalaya bad ki jylla shatei lam mihngi ka ri India.

Ia kane ka jingrakhe ia ka jingdap 51 snem ka Indian Council Agricultural Research (ACAR) la pynlong ha Dr. Dr.M.S Swaminathan Hall ICAR, Umiam ha kaba la wan ban shim bynta da u Dr. K.M Bujarbaruah Former DDG (Animal Science) ICAR, New Delhi & Former VC, AAU, Jorhat ha ka jingdonlang lang u Dr S.Hazarika Director Of ICAR RC NEHR Umiam, ki riew shemphang ha ka rep ka riang lem bad ki nongrep na kylleng ka them Ri Bhoi.

Lyngba jong kane ka sngi ba la rakhe ia kane ka sngi kyrpang ba ka ICAR ka la iaid ia u mawmer ba 51 snem ka jingiaid lynti, la pynpaw ruh ia ki jingiaroh bad ki jingmyntoi ba don kane ka ICAR kaba la long shisha ka jingmyntoi na ka bynta ban kyntiew ia ki kam rep ki kam riang, ki kam ri jingri bad kham tam ban phai khmat kyrpang sha ki nongrep ba kin pyndonkam ia ka kam rep ka kam riang kiba long katkum ka juk stad kaba  mynta.

Kine ki buit stad ba la pyndonkam ha ka kam rep ka kam riang ki kynthup naduh ki jingiarap kiba pyndonkam lyngba ki kor ki bor (Techical) bad ki jingwad bniah ha ka kam rep (Research) bad ruh khamtam ba ki nongrep ki la pyndonkam ia ka buit thymmai ha ka kam rep ka kam riang ban myntoi ki nongrep ban kyntiew ia ka ioh ka kot.

Shuh shuh, lyngba jong kane ka sngi, la lah ruh ban plie ia ka Farm School On Air bad ha kajuh ka por ki la leh burom ruh ia ki nongtrei ka ICAR kiba la don bynta ha ki kam shakri ban kyntiew ia ka rep ka riang bad ruh ka jingdon bynta ha kaba synñiang ban kyntiew ia ki kam rep ki kam riang bad kiwei kiwei ki bynta kiba ia dei bad ka kam rep kam riang.